Denis Silva: Favorit biz yox, Qarabağdır
"Neftçi"nin müdafiəçisi Denis Silvanın azerisport.az saytına müsahibəsi
- Çempionatın son turunda AZAL-la qarşılaşacaqsınız. Bu oyundan nə gözləyirsiniz?
- Bu oyuna yaxşı hazırlaşırıq. Çempionatı qələbə ilə başa vurmağa çalışacağıq.
- Qarşıda "Qarabağ"la vacib kubok oyunu var...
- Final həmişə gərgin və çətin keçir. Bu dəfə də istisna olmayacaq. Amma biz yenə də oyuna qələbə üçün çıxacağıq.
- Ağdamlıların kapitanı Rəşad Sadıqov finalda "Neftçi"nin favorit olduğunu deyib...
- Mən belə düşünmürəm. Finalın favoriti "Qarabağ"dır. Bu komanda ardıcıl iki mövsümdür ölkə çempionu olur. Ona görə də favorit məhz onlardır.
- Kubokun finalında qələbə qazansanız, bunu çempionatdakı uğursuzluğun revanşı saymaq olar?
- Bəli. Biz artıq uzun müddətdir ağdamlılara qalib gələ bilmirik. Amma final oyununa revanş hissi ilə yox, kuboku qazanmaq əzmi ilə çıxacağıq.
- Son uğursuzluqlardan, üç futbolçunun qovulmasından sonra komandada atmosfer necədir?
- Dəyişən heç nə yoxdur, hər şey əvvəlki kimidir.
- "Neftçi" ilə yeni müqavilə imzalamaq haqda düşünürsünüz?
- Hələ yeni müqavilə ilə bağlı təklif gəlməyib. Finaldan sonra müzakirə edərik.
- Bəs digər klublardan təklif var?
- Xarici klublardan var. Amma mənim kimi, ailəm də Azərbaycanda qalmaq istəyir.
- Final Qəbələdə keçiriləcək. Bu mövsüm oradakı iki oyundan birində qalib olmusunuz, digərində heç-heçəyə imza atmısınız...
- Fikrimcə, Qəbələdə oynamaq hər iki komanda üçün yaxşı olacaq.
- Yəqin ki, sizin üçün dayandırılması çətin olan oyunçulardan biri Reynaldo olacaq...
- Biz təkcə Reynaldoya yox, "Qarabağ"a qarşı oynayacağıq.
- "Neftçi" kuboku da qazana bilməsə, mövsümü boşa verilmiş saymaq olar?
- Buna qədər biz üç dəfə ardıcıl ölkə çempionu olmuşduq, iki dəfə kuboku qazanmışdıq, Avropa Liqasının qrup mərhələsində oynamışdıq. Bu finalda "Qarabağ"a uduzsaq, sadəcə, başımızı aşağı salıb, evimizə yollanacağıq. Hər halda növbəti mövsümdə uğur qazanmaq barədə düşünmək üçün vaxtımız olacaq.
- "Neftçi" bu mövsüm çempionatda niyə "Qarabağ"la rəqabət apara bilmədi?
- "Qarabağ" qızıl medalları qazanmağa layiq idi. Hər bir komandanın uğursuz dövrləri olur. "Neftçi" yaxşı komandadır, güclü oyunçuları var. Sadəcə, bu mövsüm bizdə alınmadı.