Ramin Musayev: Növbəti mövsüm də maraqlı olacaq
Peşəkar Futbol Liqasının prezidenti Ramin Musayev Topaz Premyer Liqasının 35-ci turu çərçivəsində keçirilmiş "İnter" - "Qarabağ" oyunundan sonra azerisport.az saytının suallarını cavablandırıb.
- "Qarabağ"ın ardıcıl ikinci dəfə Azərbaycan çempionu olmasını necə qarşıladınız?
- Mən bu klubun rəhbərliyini, futbolçu və məşqçi heyətini təbrik edirəm. Onlar bu mövsüm uğurlu çıxış etməyi bacardılar. Buna görə komandanı ancaq təbrik etmək olar.
- Çempionatın səviyyəsi sizi qane edir?
- Mən tərəfdən çempionata hansısa qiymət vermək düzgün olmaz. Bu barədə jurnalistlər, azarkeşlər fikir söyləməlidirlər. Klublarımız öz güclərini avrokuboklarda göstərməlidirlər. Necə ki, ötən il yaxşı çıxış etdilər.
- Klublardakı maliyyə çətinliklərini nəzərə alsaq, yeni mövsümlə bağlı gözləntilər elə də böyük deyil...
- Bu informasiyanı haradan götürdüyünüzü bilmirəm. Mənə elə gəlir ki, növbəti mövsüm də maraqlı olacaq.
- Növbəti mövsümdə Premyer Liqada neçə komandanın iştirak edəcəyi dəqiqləşib?
- Minimum 10 komanda olacağı dəqiqdir. Amma 12 klub da ola bilər. Sponsor tapılsa, 12 iştirakçı olacaq (gülür).