Ağasəlim Mircavadov: Dövlət Kəpəzə kömək edəcək, hər şey ciddi olacaq
AFFA Məşqçilər Komitəsinin üzvü Ağasəlim Mircavadovun azerisport.az saytına müsahibəsi
- Növbəti mövsümdən Premyer Liqada çıxış edəcək "Kəpəz"in baş məşqçi postuna Şahin Diniyevin dəvət olunması barədə nə deyə bilərsiniz?
- Mən artıq Diniyevi təbrik etmişəm. Ümid edirəm ki, o, orada uğur qazanacaq. Məşqçiyə işləmək lazımdır.
- Bəs bu komandanın ev oyunlarını Bakıda keçirəcəyi barədə xəbəri necə qarşıladınız?
- Bu, təəccüblü deyil. Çünki Gəncə şəhər stadionunun vəziyyəti Premyer Liqa oyunlarına ev sahibliyi etməyə imkan vermir. Əsas odur ki, böyük futbol bu şəhərə qayıdır. Şadam ki, baş məşqçi postu da yerli mütəxəssisə tapşırıldı. Mən onların uğur qazanacaqlarına inanıram.
- Ötən mövsüm də "Araz Naxçıvan"ın elitaya gəlməsinə sevinənlər çox idi...
- Bunlar arasında paralel aparmayacağam. Mən başa düşdüyüm qədərilə dövlət "Kəpəz"ə kömək edəcək. Hər şey ciddi olacaq. Bu bölgədə futbolu inkişaf etdirmək vacibdir. Çünki oradan həmişə yaxşı oyunçular çıxıb. Ölkədə futbolu inkişaf etdirmək üçün isə təkcə paytaxtla kifayətlənməyib, regionlara da diqqət ayırmaq lazımdır.
- FİFA bu gün Ukraynada yaşayan azərbaycanlı futbolçu Pavel Paşayevin yığma komandamızda oynamasına razılıq verdi. Bu xəbəri necə şərh edərdiniz?
- Onun oyununu görməmişəm. Amma belə bir futbolçu varsa, Ukrayna çempionatında çıxış edirsə, onun xidmətindən yararlanmaq lazımdır. Millimizin müdafiə xəttində rəqabətə ehtiyac var.
- "Neftçi" və "Qarabağ" arasında keçiriləcək ölkə kubokunun final oyunu ilə bağlı nə proqnozlaşdırırsınız?
- Heyətinə, sərgilədiyi oyuna görə ağdamlılar güclüdürlər və kuboku qazanmalıdırlar.
- "Neftçi"də baş verən son hadisələrlə bağlı nə deyə bilərsiniz?
- Kənardan nəyəsə qiymət vermək çətindir. Ona görə də klubun daxili işlərinə qarışmamaq daha doğru olar. Yeni rəhbərlik gəlib. Onların işə öz baxışları var. Yəqin nəsə bilirlər ki, belə edirlər. Elvin Yunuszadə, Rauf Əliyev və Mirhüseyn Seyidovu heyətdən uzaqlaşdırdılar. Rəhbərliyin bu qərarına hörmətlə yanaşmaq lazımdır.
- Mövsümün sonunun belə darıxdırıcı alınması sizi narahat etmir?
- Məni təkcə mövsümün sonu yox, bütövlükdə bu mövsümün özü narahat edir. "Bakı"da hər şey çox pis alındı. "İnter" və "Simurq"da baş verən olaylardan da hər kəsin xəbəri var. "Xəzər Lənkəran" öz strategiyasını dəyişdi. Təbii ki, bütün bunların fonunda Premyer Liqaya maraq çox azaldı. Çempionatı gücləndirmək, keyfiyyəti artırmaq lazımdır.
- Bəlkə belə bir mövsümdən sonra klublarımızdan avrokuboklarda ciddi uğurlar gözləməyək?
- Hər şeyə rəğmən mən "Qarabağ"dan ən azı ötən mövsümkü uğuru təkrarlamasını gözləyirəm. Son hadisələrlə əlaqədar "İnter"in şansları barədə danışmağa çətinlik çəkirəm. "Neftçi"nin bu yay güclənməyə ehtiyacı var. Baxaq, görək onlar özlərini transfer bazarında necə göstərəcəklər. "Qəbələ"nin isə uğurlu çıxış etmək şansı var.
