Rəhman Hacıyev: İstisna deyil ki, Neftçi yayda məndən də imtina etsin
"Neftçi"nin yarımmüdafiəçisi Rəhman Hacıyevin azerisport.az saytına müsahibəsi
- Ötən gün "Neftçi"nin idman direktoru Vəli Qasımov saytımıza müsahibəsində bəyan etdi ki, futbolçuların məşqlərdəki fəallığı artıb. Komandada nə dəyişib ki?
- Deməzdim ki, əvvəllər vəziyyət çox pis idi. Qarşıda vacib oyunlarımız var ki, onları qalib başa vurmağımız lazımdır. Bunu hamı yaxşı başadüşür. Biz həvəskar klub deyilik ki, "İnter"ə böyük hesablı məğlubiyyətdən sonra ruhdan düşək.
- Rauf Əliyev, Mirhüseyn Seyidov və Elvin Yunuszadənin komandadan uzaqlaşdırılması komandanın digər futbolçularına necə təsir etdi?
- Əlbəttə, bu, bizə mənfi təsir etməyə bilməzdi. Onlar əvvəllər bizim komanda yoldaşlarımız idi. İstəməzdi ki, belə olsun. Amma rəhbərlik belə qərar qəbul etdi ki, onların hardasa səhvləri olub. Biz bunu müzakirə edə bilmərik.
- Sizin son uğursuzluqlarınızda məhz bu üçlük günahkar idi?
- Biz vahid bir komandayıq və uğursuzluqda hər kəsin günahı var.
- Rəhbərliyin bu yay ciddi dəyişiklər etməsi gözlənilir. Bu dəyişikliyin sizə də təsir edəcəyini düşünmürsünüz?
- "Neftçi" ilə müqaviləmin müddəti 2017-ci ildə başa çatacaq. Amma tamamilə mümkündür ki, rəhbərlik yayda məni da komandadan uzaqlaşdırsın. Bunu istisna etmirəm. Saxlaya da bilərlər. İndi bunu proqnozlaşdırmaq çətindir. Mümkündür ki, yayda özümə yeni komanda axtarmalı olum.
- Bu barədə yaman rahat danışırsınız...
- Bir futbolçu kimi mən də hər şeyə hazır olmalıyam. Əlbəttə, "Neftçi"də qalmağı çox istərdim. Komandama faydalı olmaq istəyirəm. Amma hər şey mümkündür.
- Çempion "Qarabağ" "Neftçi" ilə kubokun final matçında da qalib gəlib, qızıl dubla imza atmaq istəyir...
- "Qarabağ" şübhəsiz ki, güclü komandadır. Amma biz də Azərbaycan Kubokunun final matçına yaxşı hazırlaşırıq. Meydana çıxıb, var gücümüzü meydanda qoymağa hazırıq. Kuboku qazanmağa çalışacağıq. Klubumuzda hər kəs bunu çox istəyir.
