Rəşad Eyyubov: Məni heyətində görməyi daha çox arzulayan kluba keçəcəyəm
"Simurq"un yarımmüdafiəçisi Rəşad Eyyubovun azerisport.az saytına müsahibəsi
- "Simurq"un əksər futbolçuları bir neçə aydır maaş almamasına etiraz edir. Hazırda klubda vəziyyət nə yerdədir?
- Rəhbərlik bizi dəstəkləyir və sakitləşdirməyə çalışır. Bizi inandırmağa çalışırlar ki, növbəti mövsümdə komandada maliyyə problemi olmayacaq, vəziyyət sabitləşəcək. Ümid edirəm ki, elə də olar.
- Artıq bəzi legionerlər komandanı tərk edib...
- Onlara ikiqat çətindir. Çünki ailələrindən kənarda yaşayırlar. Onları başa düşmək olar. Amma komandamızda yaxşı gənc futbolçular var. Son turlar onlar üçün özlərini göstərmək baxımından bir şansdır.
- Gedən əcnəbi futbolçuların bəzi ala bilmədiyi maaşına görə FİFA-ya şikayət edəcəyini bildirib. Bəs sizin belə fikriniz varmı?
- Səbəbini bilmirəm. Amma Azərbaycanda yerli futbolçularla FİFA şərtlərinə uğrun müqavilə imzalamırlar. Ona görə də mən belə şikayət edə bilmərəm. Həm də klub prezidenti ilə münasibətim yaxşıdır. Bu problemi ancaq onun özü ilə şəxsən görüşüb həll edə bilərəm.
- "Bakı" üzərində qazandığınız 4:0 hesablı qələbə ilə bağlı nə deyə bilərsiniz?
- Şəxsən mənim üçün hər bir oyun vacibdir. Qələbə qazanmağımızı çox istəyirdim. Hərdən sosial şəbəkələrdə haqqımızda yazılanları oxuyanda çox məyus oluram. Guya biz aldığımız pula layiq futbol sərgiləmirik, ancaq pulu düşünürük. Amma elə deyil. Artıq 3 aydır maaş almırıq, amma yenə də meydanda maksimum güc qoymağa çalışırıq.
- Mətbuatın yazdığına görə, "Simurq"a bundan sonra "Lukoyl" sponsorluq edəcək...
- Düzünü desəm, mənim üçün sponsorun kim olmasının fərqi yoxdur. İstəyir lap Mikki Maus olsun, amma "Simurq" yaşasın. Bu komanda dağılmamalıdır.
- Mövsümün sonunda başqa klublardan birinə keçəcəyiniz haqda deyilənlər nə dərəcədə doğrudur?
- Təkliflər var. Amma hər şeyə bundan sonra aydınlıq gələcək. Bu mövsüm 11 qol vurmuşam. Hər halda yarımmüdafiəçi üçün normal göstəricidir.
- "Qəbələ", "Qarabağ" və "Xəzər Lənkəran"ın sizi heyətinə qatmaqda daha israrlı olduğu bildirilir...
- Mətbuat çox şey yaza bilər. Onsuz da məni hansı klubların istədiyi çoxlarına məlumdur. Amma məni heyətində görməyi daha çox arzulayan kluba keçəcəyəm. Əsas odur ki, klub rəhbərliyi və baş məşqçi mənə güvənsin. Məsələn, "Simurq"dakı kimi.
- Gənclərdən qurulan heyətlə AZAL və "Xəzər Lənkəran"la oyunlardan nə gözləyirsiniz?
- Sonadək oynayacağıq. Amma nəticənin necə olacağını söyləmək bir qədər çətindir.