Arif Əsədov: Vəli Qasımovla aramızda fikir ayrılığı axtarmaq mənasızdır
"Neftçi"nin baş məşqçisi Arif Əsədovun azerisport.az saytına müsahibəsi
- "Neftçi" "İnter"lə ölkə kubokunun cavab yarımfinal oyununa da itkilərlə çıxacaq?
- Bəli, Məqsəd İsayev, Rauf Əliyev və Flavinyo hələ də müalicə alır. Elvin Yunuszadə də sarı vərəqə limitini keçdiyinə görə bu görüşdə forma geyməyəcək.
- Bəs bu qarşılaşmadan nə gözləyirsiniz?
- İlk oyunda iki cavabsız qol vurmağa nail olduq. Bu, yaxşı nəticədir. Amma bizim sakitləşməyimizə əsas vermir. Sabah bizi daha çətin oyun gözləyir. Ona görə də bu oyunda uğur qazanmaq barədə düşünürük.
- Komandanız erkən qol vurmağa çalışacaq?
- Təbii ki, erkən qol vursaq, bu, bizim işimizi asanlaşdıracaq. Hesabı qorumağa çalışmamalıyıq. Bu, bizim planlarımıza daxil deyil. Qol vurmağa çalışacağıq.
- "Neftçi" finala çıxsa, həlledici oyunda hansı komanda ilə qarşılaşmaq istərdiniz?
- Fərqi yodur. Bizim üçün hazırda daha vacib olan məsələ həlledici oyuna vəsiqə qazanmaqdır. Amma şübhəsiz ki, azarkeşlərə finalda "Neftçi" - "Qarabağ" oyununu izləmək daha maraqlıdır. İstənilən halda biz rəqiblərə fərq qoymuruq və seçim aparmaq fikrimiz yoxdur. Əminəm ki, finaldakı rəqibimiz "Simurq" da olsa, bizim üçün asan olmayacaq.
- Sonuncu mətbuat konfransınızda yeni təyin olunan idman direktoru Vəli Qasımovla görüşmədiyinizi demişdiniz...
- (gülür) Artıq iki dəfə görüşmüşük. Bəzi jurnalistlər Qasımovun bu təyinatını fərqli şərh etməyə çalışır. Mən Qasımovla "Neftçi"də birgə çaışmışam. O vaxt mən əvəzedici komandanın baş məşqçisi idim, Qasımov isə idman direktoru idi. Onunla birgə Ukraynada məşqçi kursunda da iştirak etmişəm.
- Yəni jurnalistlərə sizin aranızda fikir ayrılığı tapmaq nəsib olmayacaq?
- (gülür) Axtarmağa ehtiyac da yoxdur. Bizim gözəl münasibətimiz var. Onunla çalışmaq mənə çox rahat olacaq.