Elvin Yunuszadə: Neftçinin futbolçuları bir-birini dəstəkləməlidir
"Neftçi"nin müdafiəçisi Elvin Yunuszadənin azerisport.az saytına müsahibəsi
- "Qəbələ"yə məğlubiyyətlə bağlı nə deyə bilərsiniz?
- Bu komanda ilə oyunlarımız həmişə çətin keçir. Çünki "Qəbələ"nin yaşı kollektivi, öz oyun üslubu var. Hətta qalib gəldiyimiz oyunlarda da çoxlu çətinliklə qarşılaşmışdıq. Fikrimcə, bu dəfə birinci hissəni yaxşı keçirdik. İkinci qolu buraxdıqdan sonra hesabı bərabərləşdirmək üçün irəli atılsaq da, növbəti dəfə qapımızda top gördük.
- "Qəbələ"nin ikinci qolu zamanı nəyə etiraz edirdiniz?
- Hakimlik barədə danışmaq istəmirəm. Amma məncə, top Cavid Hüseynovun əlinə dəymişdi. Epizoda baxmaq lazımdır. Hakimin durduğu yerdən bunu görmək mümkün deyildi.
- "Qəbələ"nin sizinlə oyundan öncə 6 ardıcıl qələbəsi sizi narahat etmirdi?
- Biz də əvvəlki beş oyunda uduzmamışdıq, onların dördündə qələbə qazanmışdıq. Bu, futboldur, biri qalib gəlib gələndə, digəri də uduzur. Artıq qarşıdakı kubok oyununa hazırlaşmalıyıq və qələbə qazanmağa çalışmalıyıq.
- "Qəbələ" bu qələbə sayəsində sizinlə xal fərqini daha da azaltdı. Demək olar ki, bundan sonra "Neftçi" ikinci pilləni tutmaq haqda yox, üçüncülüyü qorumaq barədə düşünməlidir?
- Qorxulu heç nə yoxdur. Hələ hər şey qarşıdadır. İndidən nəsə demək olmaz. Bu oyun geridə qaldı, qarşıdakı düşünməliyik.
- Bu oyunda qapını Aqil Məmmədov yox, Saşa Stamenkoviç qorudu. Bunun təsiri oldumu?
- Hər birimizin səhvə yol verdiyimiz oyunlar olur. Saşanı dəstəkləməyimiz lazımdır. Əgər uduzduqsa, deməli, komanda olar günahkarıq. Bunu təkcə qapıçının üstünə atmaq olmaz.
- Bəs belə dəyişikliyə səbəb nə idi?
- Bu, baş məşqçinin qərarı idi. Biz də buna hörmətlə yanaşırıq. Qapıda Saşa dayanmışdısa, deməli, belə də olmalıydı.
- "Qəbələ"nin ikinci qolundan sonra meydanda futbolçular arasında çoxlu mübahisə yaranırdı. Nə baş vermişdi?
- Belə hallar olur. Hər iki komanda qələbə qazanmaq istəyirdi. Nə oldusa, meydanda da qaldı.
- Düşünmürsünüz ki, bu məğlubiyyət "İnter"lə kubokun cavab yarımfinal oyunu öncəsi sizə pis təsir edə bilər?
- Əlbəttə, məğlubiyyət xoşagəlməzdir. Amma biz bir-birimizi dəstəkləməliyik. "İnter"lə oyuna tam hazır olmalıyıq. Həm də biz təkcə kubokda yox, Premyer Liqada da mübarizəni sonadək davam etdirməliyik. Çünki ölkə çempionatı da bizim üçün eyni dərəcədə vacibdir. Həm də kubokda hələ özümüz üçün heç nəyi təmin etməmişik.
