Viktor Mendi: Mükafatçılar sırasında yer almaq istəyirik
"Qəbələ"nin hücumçusu Viktor Mendinin azerisport.az saytına müsahibəsi
- "Neftçi" ilə oyundan nə gözləyirsiniz?
- Hər iki komanda yaxşı formadadır. Öz qol vəziyyətlərindən daha yaxşı yararlanacaq komanda qalib gələcək.
- Bu komanda ilə son oyununuzda 1:3 hesabıyla məğlub olmuşdunuz...
- Bəli, həmin oyun bizim üçün çox uğursuz alındı. Xüsusilə də ikinci hissəsi. Amma həmin oyun artıq geridə qalıb. Əminəm ki, "Neftçi" də "Qəbələ"nin həmin komanda olmadığını gözəl bilir. İndi biz istənilən rəqibə qalib gəlməyə hazırıq. Bunu son oyunlarımız da sübut edir.
- "Qəbələ" üçün "Neftçi" ilə oyun üçüncü yeri tutmaq baxımından çox əhəmiyyətlidir...
- Bu yolda təkcə "Neftçi" ilə qarşılaşma yox, qalan bütün oyunlarımız əhəmiyyət daşıyır. Düzdür, dördüncü yer də bizim Avropa Liqasında çıxış etməyimizə şərait yarada bilər. Amma bu, o demək deyil ki, biz mükafatçılar sırasında yer almaq istəmirik. Bunun üçün sonadək mübarizə aparacağıq.
- Ardıcıl altı qələbənin davamı gələcək?
- Buna ümid edirəm. Qələbə seriyamız nə qədər uzun olsa, turnir cədvəlinin üst pillələrində qərarlaşmaq şansımız da çox olacaq.
- Roman Qriqorçukun Dorinel Muntyanudan daha uğurlu məşqçi olduğunu demək olar?
- Bu suala cavab vermək çətindir. Amma mənə elə gəlir ki, biz Muntyanunun taktikasına uyğunlaşa bilmədik. Bunun üçün sadəcə, vaxtımız olmadı. Yeni baş məşqçinin taktikası isə çox asandır. Həm də uğur gətirir.
- "Qəbələ" ilə müqavilənizin vaxtı nə zaman bitir?
- Bu mövsümün sonunda. Amma bu barədə indidən düşünmək istəmirəm. İndi məni komandamın uğurlu çıxış etməsi daha çox maraqlandırır.
- Bəs siz özünüz Azərbaycan karyeranızın davam etməsində maraqlısınız?
- Hələ sizə bu barədə heç nə deyə bilmərəm. Mövsümün sonunda klub rəhbərliyi ilə bu barədə söhbətimiz olacaq.