Rüfət Dadaşov: Milliyə qayıtmağı çox istərdim, amma dəvət alıb-almayacağımı bilmirəm
Azərbaycan yığmasının və Almaniyanın "Saarbryukken" klubunun hücumçusu Rüfət Dadaşovun azerisport.az saytına müsahibəsi
- Berti Foqtsun dövründə yığmaya mütəmadi dəvət olunsanız da, Robert Prosineçki sizi Malta ilə seçmə mərhələ oyununa çağırmadı...
- Mənim zədəm var idi və bu üzdən üç ay oynamadım. Artıq komanda ilə məşqlərə başlamışam və hər şey qaydasındadır. Amma qısa müddət ərzində heç nə edə bilməzdim.
- Azərbaycan - Malta matçına baxmısınız?
- Mən bu oyunu gözləyirdim və baxmaq istəyirdim. Amma evimdə internetlə bağlı problem yarandı. Oyundan dərhal sonra icmala baxmaq şansım oldu. Vurduğumuz hər iki qolu gördüm.
- Komandamız icmalda necə təsir bağışladı?
- Komandamız normal görünürdü. Qollar da yaxşı alındı. Uşaqları bu qələbə münasibəti ilə təbrik edirəm.
- 2013-cü ildə keçirilən Bakıdakı Malta ilə yoxlama oyununda (3:0) siz iki qol vurmuşdunuz. Bu rəqibi rəsmi oyunda da məğlub edəcəyimizi gözləyirdiniz?
- İki il əvvəlki oyunun asan alındığını deməzdim. Statusundan asılı olmayaraq, heç bir oyun asan olmur. Amma bu dəfə də qalib gələcəyimizə şübhə etmirdim. Azərbaycan yığmasında kifayət qədər yaxşı futbolçular var. Onların sayəsində Malta kimi rəqiblərə qarşı oyunlarda qələbəyə ümid etmək olar. Hətta heç-heçə də gözləmirdim.
- Norveçlə oyuna dəvət alacağınıza inanırsınız?
- Hər keçən gün əvvəlki formama qayıtdığımı daha da hiss edirəm. Bundan sonra təkcə forma yığmaqla məşğul olmaqla kifayətlənməyib eyni zamanda özümü ikinci zədədən də qorumalıyam. Robert Prosineçkinin mənə dəvət göndərib göndərməyəcəyini bilmirəm. Mənə bu barədə danışmaq çətindir. Mənim üçün əsas forma toplamaqdır. Təbii ki, yığmaya qayıtmağı çox istərdim. Öz ölkənin milli komandasında oynamaq hər bir futbolçu üçün şərəf və fəxrdir.
- Yeni məşqçilər korpusu heç sizinlə maraqlanır?
- Bu barədə heç nə deyə bilmərəm. Siz ən yaxşı bunu onlardan soruşun.
- Mövsümün sonu yaxınlaşır. Azərbaycan klublarından təklif yoxdur?
- Mənə təkliflər var. Amma bunu Azərbaycana aid edə bilmərəm. Çünki oradan mənimlə heç kim maraqlanmayıb.
