Mahir Şükürov: Maltaya ciddi yanaşmasaq, xal itirə bilərik
Azərbaycan yığmasının və Türkiyənin "Karşıyaka" klubunun müdafiəçisi Mahir Şükürov AÇ-2016-nın seçmə mərhələsi çərçivəsində Maltaya qarşı keçiriləcək oyun öncəsi fikirlərini açıqlayıb. Azerisport.az saytına müsahibəsində o, öncə bunları söyləyib:
- Azərbaycan xalqını Novruz Bayramı münasibətilə təbrik edirəm. Artıq bir neçə gündür məşq edirik. Komandada atmosfer yaxşıdır. Başa düşürük ki, bizi asan oyun gözləmir. Bütün gücümüzlə məşq edirik. Yeni baş məşqçidən daha çox şey öyrənməyə çalışırıq. Əsas öz meydanımızda qələbə qazanmaqdır. Sonra digər oyunlar barədə düşünərik.
- Malta ilə oyundan nə gözləyirsiniz?
- Maltanı evdə məğlub etməliyik. Futbolda sürprizlər də olur. Əgər rəqibə ciddi yanaşmasaq, xal itirə bilərik. Öz futbolumuzu oynasaq, qələbə qazanacağıq.
- Azarkeşlər də ancaq qələbə gözləyirlər...
- Bunu biz də başa düşürük, bilirik. Biz də azarkeşləri tribunalara qaytarmaq istəyirik. Yəqin ki, bizdən küsüblər.
- Malta yığması barədə nə bilirsiniz?
- Biz onları ötən il məğlub etmişdik. Tezliklə Gürcüstana qarşı keçirəcəkləri yoxlama matçına da baxacağıq. Bizə bu rəqib barədə ətraflı məlumat verəcəklər.
- Prosineçki Berti Foqtsdan nə ilə fərqlənir?
- Foqts müdafiə olunmağı xoşlayırdı, Prosineçki isə əksinə. Yeni baş məşqçinin nə istədiyini tam olaraq oyun göstərəcək. Amma məşqlərdən də görünür ki, o, hücum futbolu sərgiləməyimizi istəyir.
- Siz özünüz oyuna hazırsınız?
- Bəli. Bir az ağrılarım var idi. Amma indi tam qaydasındayam.