Fariz Nəcəfov: Qarabağa qalib gələcəyimizi gözləmirdim
"Qəbələ"nin vitse-prezidenti Fariz Nəcəfovun azerisport.az saytına müsahibəsi
- "Qəbələ"nin səfərdə "Qarabağ"a qalib gələcəyini gözləyirdiniz?
- Biz hər oyundan yaxşı futbol gözləyirik və inanırdıq ki, bu dəfə də elə olacaq. Amma düzünü desəm, qələbə qazanacağımızı gözləmirdim. Baxmayaraq ki, meydana qələbə üçün çıxmışdıq.
- "Qəbələ" üç oyunda uduzub, iki görüşdə qələbə qazanıb. Sizə elə gəlmir ki, komanda bu baş məşqçi ilə heç nəyə nail ola bilməyəcək?
- Biz Roman Qriqorçuka tam güvənirik. Biz hələ təyinatdan öncə kifayət qədər analiz etmişdik və komandamıza uyğun mütəxəssis olduğu qənaətinə gəlmişdik. Sadəcə, ona vaxt lazımdır.
- Amma onun bütün transferləri ümidləri doğrultmur. Ruslan Fomin artıq start heyətdəki yerini də itirib. Onun yayda komandanı tərk edəcəyi də bildirilir...
- Büz bütün yeni futbolçularla 5 aylıq müqavilə imzalamışıq. Kimin qalıb, kimin gedəcəyi yayda bilinəcək. Buna baş məşqçi qərar verəcək. Yenilərdən indiki məqamda 100 faiz yaxşı oyun gözləmək düz deyil. Uyğunlaşma prosesi hamıda asan keçmir. Məsələn, qapıçı Dmitri Bezotosnı bu mərhələni uğurla keçirdi. Fikrimcə, qalanları da onun yolu ilə gedəcək.
- "Qəbələ" avrokuboklara vəsiqəni hansı turnir vasitəsilə qazanmağa üstünlük verir?
- Komandamız hər oyuna yüksək səviyyədə köklənir. Qarşıda bizi "Simurq"la kubok matçı gözləyir. Bütün diqqətimiz bu qarşılaşmaya yönəlib.
- Qriqorçukun qarşısına kuboku qazanmaq hədəfi qoyulmayıb?
- Heç bir baş məşqçi gəldiyi ildə hansısa turnirin qalibi olmağı vəd edə bilməz. Amma o, "Qəbələ"nin mövsümün yekununda avrokuboklarda oynaması üçün çalışacağını deyir.
- Manatın devalvasiyası komandanıza nə dərəcədə təsir göstərib?
- Hələ klub prezidenti ilə bu barədə söhbətimiz olmayıb. Amma şübhəsiz ki, problemlər bizdən də yan keçməyəcək. Bunun nə dərəcədə hiss ediləcəyini zaman göstərəcək.
- Bəs bu futbolçulara nə dərəcədə təsir edə bilər?
- Biz istənilən halda futbolçulara maaşı müqavilədə nəzərdə tutulan qaydada verməyə borcluyuq. Çünki bütün müqavilələrdə maaşlar dollarla göstərilib.
- Deməli, klubunuz indiki halda zərərlə çalışır...
- Prinsipcə, elədir. Amma bunun nə dərəcədə hiss olunduğunu zaman göstərəcək.