Cihan Özkara: Hakimin Marko Stanoyeviçlə bağlı qərarını düzgün saymıram
"Simurq"un hücumçusu Cihan Özkaranın azerisport.az saytına müsahibəsi
- "İnter"lə oyun barədə fikirlərinizi bilmək istərdik...
- İlk növbədə "İnter"i təbrik edirəm. Biz pis oynadıq və heç nədən qollar buraxdıq. Səhvlərə yol verdik ki, bunlar olmamalıydı. Avrokuboklarda oynamaq istəyiriksə, belə səhvlər buraxmamalıyıq. Məğlubiyyətə görə çox məyusam. Amma bu, son deyil. Hazırlaşmaq və növbəti oyunlarda qalib gəlmək lazımdır.
- Siz fasilədən sonra meydana çıxsanız da, heç nə ilə yadda qalmadınız...
- Heç nə etmədiyimə dair fikirlə razı deyiləm. Fikrimcə, oyuna yaxşı qoşuldum. Çalışdım ki, imkan daxilində komandama kömək edim. Amma həmin vaxt 0:2 hesabıyla geridə idik və atmosfer yaxşı deyildi. Son dəqiqələrdə qollardan birinin əvəzini çıxsaq da, artığına nail ola bilmədik.
- Komandanın pis oynaması nə ilə bağlıdır?
- Əla komandamız var. Amma hazırda qeyri-adi dövr keçiririk. Əminəm ki, tezliklə yenidən yaxşı oynamağa və qələbələr qazanmağa başlayacağıq. Çünki əla baş məşqçimiz və yaxşı futbolçularımız var.
- Marko Stanoyeviçin qırmızı vərəqə alması barədə nə deyə bilərsiniz?
- Mən hakimlərin işinə qarışa bilmərəm. Qırmızı verilibsə, deməli, nəsə səbəbi var.
- Sizcə, düzgün qərar idi?
- Mən onu düzgün qərar hesab etmirəm.
- Bəs sizcə elə fol etməyə ehtiyac var idi?
- Marko elə kobudluğa əl atacaq futbolçu deyil. Sadəcə, vəziyyət elə alındı. Mənə elə gəlir ki, o, rəqibin ayağına kobudluq etmək üçün toxunmamışdı.
- Qarşıda sizi "Qəbələ" ilə kubok oyunu gözləyir...
- "Qəbələ" yaxşı komandadır. Bizim də yaxşı komandamız var. Nəticə qazanacaq gücümüz var. Müsbət nəticə qazanmaq üçün mübarizə aparacağıq.