Toğrul Erat: Maltaya qalib gələcəyimizə əminəm
Azərbaycan yığmasının və Almaniyanın "Fortuna" klubunun yarımmüdafiəçisi Toğrul Eratın azerisport.az saytına müsahibəsi
- "Fortuna"nın "Nürberq"lə oyununda meydana çıxmamağınızın səbəbi nə idi?
- Mən ehtiyatda qalmalı oldum. Bu, baş məşqçinin qərarı idi. 1:3 hesabıyla uduzduq. Komanda bu oyunda yeni taktika ilə oynayırdı - 3-5-2. Oyunu da məhz bu üzdən kənardan izləməli oldum. Əgər hər şey yaxşı olsa, növbəti oyunda meydanda olacağam.
- Taktika yenidən dəyişəcək?
- Məşqçinin bu taktikası faydalı olmadı və uduzduq. Ona görə istisna deyil ki, növbəti oyunda fərqli taktika olsun. Fikrimcə, mənə də şans verəcək.
- Yığmamızın son toplanışına dəvət olunmamışdınız...
- Millinin bu günlərdə toplanışda olduğundan xəbərim var.
- Ukrayna "Şaxtyor"u ilə oyuna baxmısınız?
- Baxa bilmədim. Həmin vaxt məşqimiz var idi. Oyun barədə xüsusi bir şey eşitməmişəm. Heyəti görmədiyimə görə niyə uduzduğumuzu da bilmirəm. Amma "Şaxtyor" güclü komandadır. Yəqin ki, Robert Prosineçki futbolçuların imkanlarını yoxlamağa çalışıb. Yəni uduzmağın, qələbə qazanmağın elə də fərqi yoxdur.
- Robert Prosineçki sizi tanıyır?
- Bəli, əlbəttə. Onun köməkçisi ilə görüşmüşəm. Dedi ki, martın 20-də dəvət göndərəcəklər.
- Kiminlə görüşmüşdünüz?
- Xorvatiyalı məşqçi idi. Bir az söhbətləşdik. Sadəcə, onu eşitdim ki, bizi də yığmaya dəvət etməyə hazırlaşırlar.
- Yəni dəvət gözləyirsiniz?
- Mən yığma komandanı unutmuram. Amma məni yada salıb-salmayacaqlarını martın 20-də görəcəyik. Çağırsalar, sevinərəm. Çağırmasalar da, bunda faciəvi heç nə yoxdur. Futbol elə bir oyundur ki, daim üzərində çalışmalısan. İstənilən halda Malta ilə oyunda yığmaya uğurlar arzulayıram.
- Həmin oyundan nə gözləyirsiniz?
- Hər şeyi zaman göstərəcək. Xüsusi bir gözləntim yoxdur. Azərbaycan yığmasında çox yaxşı oyunçular var. İstənilən halda, Maltaya qalib gələcəyimizə əminəm.