Elvin Yunuszadə: Neftçi üçün azarkeşsiz oynamaq ağırdır
"Neftçi"nin müdafiəçisi Elvin Yunuszadənin azerisport.az saytına müsahibəsi
- "Sumqayıt"la oyuna hazırlıq necə gedir?
- Fikrimcə, oyuna qədər komanda yaxşı vəziyyətdə olacaq. Təəssüf ki, mən bu görüşü sarı vərəqə limitini aşdığıma görə buraxmalı olacağam. Komandamızın bu görüşdə xal itirməməsini çox istərdim. "Sumqayıt" sıradan rəqib deyil. Hörmət ediləsi komandadır. Amma komandamız bu görüşə ciddi hazırlaşıb. Mütləq 3 xal qazanmağımız lazımdır.
- "Neftçi" AZAL-la oyunda inamlı təsir bağışladı. Bu oyunu ən yaxşılardan saymaq olar?
- İki fərqli hissə alındı. Birinci hissədə "Neftçi" ideal futbol sərgilədi. Amma ikinci yarı bir qədər fərqli alındı. Bilmirəm bu, yorğunluqdan irəli gəlirdi, ya yox. Ot örtüyünün də təsiri az olmadı. Süni örtüklü qazonda oynamaq həm mənə, həm də komanda yoldaşlarıma çətindir. Əsas odur ki, qalib gəldik. Bu üç xal bizə çox kömək edəcək.
- Siz oyunun gedişində Freddi Mombonqo ilə tez-tez mübahisə edirdiniz. Nə baş vermişdi?
- Futbolda belə hallar olur. Oyundan sonra hər şey unudulur. Başqa heç nə olmayıb.
- Razısınız ki, "Neftçi" artıq çempionluq mübarizəsindən kənarda qalıb?
- Qarşıda hələ çox oyun var. Hər şey ola bilər. Hələ kubok oyunları da var. Sonadək oynayacağıq.
- Amma komanda yoldaşınız Erik Ramos bəyan edib ki, "Qarabağ" 4-5 turdan sonra çempionluğu rəsmiləşdirəcək...
- "Qarabağ" çempionluğu 90 faiz həll edib. Amma hələ tam rəsmiləşdirməyib. Mən də deyirəm ki, komandamız bu vəziyyətlə barışan deyil və mübarizəni axıra qədər aparmaq lazımdır.
- Son oyunda azarkeşsiz oynamaq necə idi?
- Bu, istənilən komanda üçün ağırdır. Eləcə də "Neftçi" üçün. Çünki futbolçular azarkeşlərdən az motivasiya almır.
- Son dövrlər gərgin qrafiklə oynamaq sizə təsir etmir?
- Əlbətə, 3-4 gündən bir oynamaq asan deyil. Amma bu, bizim işimizdir.
- "Neftçi"də maliyyə problemlərinin olduğu barədə deyilənlər doğrudur?
- Bu barədə heç nə deyə bilmərəm. Fikrimcə, hər şey yaxşı olacaq. İnanıram ki, "Neftçi" əvvəlki günlərinə qayıdacaq.