Şahin Diniyev: Yığmamız göstərdi ki, sürətli əks-hücumlar qurmağı bacarır
AFFA-nın Məşqçilər Komitəsinin üzvü Şahin Diniyev Azərbaycan yığma komandasının Ukrayna "Şaxtyor"u ilə yoxlama oyununu şərh edib. Azerisport.az saytına açıqlamasında o, öncə bunları söyləyib:
"Şaxtyor" sıradan bir komanda deyil. Hər il Çempionlar Liqasında çıxış edir, Avropanın aparıcı klubları ilə mübarizə aparır. Bütün dünyada klub komandaları yığmalardan daha güclü olur. Elə "Barselona" ilə "Real"ın İspaniya yığmasından daha güclü olduğunu hesab edirəm. "Şaxtyor"la qarşılaşma da Azərbaycan yığması üçün böyük təcrübə oldu".
Diniyev yeni baş məşqçi Robert Prosineçki barədə də xoş sözlər söyləyib: "Komandamız düzgün yoldadır. Çünki baş məşqçi düzgün taktika və strategiya seçib. Bizə yığmaya daha çox gəncləri cəlb etmək lazımdır ki, Prosineçki də bunu edir. Onun komandanın hücum potensialını açması mənim xoşuma gəlir. Futbolçular da göstərdilər ki, onlar hücum futbolu sərgiləməyi bacarırlar".
"Əlbəttə, bizim dünya və Avropa çempionatının final mərhələsinə çıxmağımızdan danışmaq gülməli olar. Amma komandanın yaxşı futbol sərgiləyəcəyinə ümid var".
"Komandanın müdafiədən hücuma çıxması xoşuma gəldi, xüsusilə də sayları. Yığmamız sürətli əks-hücumlar təşkil etməyi bacardığını göstərdi. Hansı ki, əvvəllər bunu çox az görürdük. Bu oyunda isə qolu da məhz əks-hücumda vurduq. Namiq Ələsgərovun qolu möhtəşəm alındı".
"Gənc oyunçuların sayının çox olması oyuna təsirsiz ötüşmədi. Əgər ikinci hissədə də ən azı hər xətt üzrə bir təcrübəli futbolçu meydanda olsaydı, oyunumuzda daha çox əminlik olardı. Amma gənclərlə də hücumlar qururduq, qol vəziyyətləri yaradırdıq. Bədavi Hüseynovun oyunu çox xoşuma gəldi. Onun müdafiə xəttindəki çıxışı səhvlərin daha az olmasına gətirib çıxardı".
Diniyev sonda oğlu Coşqunun da çıxışına qiymət verib: "Coşqunun oyununa gəlincə, o, potensialından aşağı çıxış etmədi. Amma ona dedim ki, daha çox açılması, özünü təklif etməsi lazımdır. Bu, tək ona yox, ikinci hissədə meydana çıxan bütün futbolçularımıza aiddir".
