Elxan Məmmədov: Bu, Ramin Musayevin problemi deyil
AFFA-nın baş katibi Elxan Məmmədovun azerisport.az saytına müsahibəsi
- Yığmamızın Ukrayna "Şaxtyor"u ilə oyunu barədə təəssüratlarınız necədir?
- Bu, Robert Prosineçkinin rəhbərliyi altında ilk matç idi. Yığmamızın güclü rəqiblə qarşılaşmasını istəyirdik. Bir neçə komandayla, əsasən də yığmalarla danışıq aparmışdıq. Prosineçki də rəqibin güclü olmasını tələb edirdi. Şadam ki, "Şaxtyor" kimi rəqiblə qarşılaşdıq. Bu komandanı Avropanın ən güclülərindən saymaq olar. Təəssüf ki, bura tam heyətlə gələ bilməmişdik. Bu üzdən də Prosineçki bütün futbolçuları iş başında görə bilmədi. "Şaxtyor"a da minnətdaram ki, oyuna ciddi yanaşdılar. Bu oyunda gənc oyunçularımızın meydana çıxması da məni sevindirdi.
- Komandada əvvəlki oyunlarla müqayisədə hansısa dəyişiklik hiss etdiniz?
- Əlbəttə, 4-1-4-1 taktikasına keçildiyi dərhal hiss olunurdu. Prosineçki açıqlamalarında dəfələrlə qeyd etmişdi ki, komandası hücum futbolu sərgiləyəcək.
- "Şaxtyor"dan başqa hansı variantlar var idi?
- İordaniya, Yəmən, Moldova və Rumıniya yığmaları ilə qarşılaşa bilərdik. Rumınlar ayın 15-də oynamaq istəyirdilər. Ona görə alınmadı. Qroznı "Terek"i ilə də oynamağımız mümkün idi. Amma şadam ki, məhz "Şaxtyor"la qarşılaşdıq.
- Manatın dəyərinin düşməsi AFFA-nın büdcəsinə təsir etməyəcək?
- Martın 6-da AFFA-nın konfransı keçiriləcək. Həmin konfransda büdcə ilə bağlı hesabat veriləcək və yeni büdcə tərtib olunacaq. Manatın dəyərdən düşməsinin büdcəmizə təsir edəcəyini düşünmürəm. Bizim sabit büdcəmiz var. Onun da böyük əksəriyyəti infrastruktura xərclənir.
- Növbəti mövsümdən hansı yenilikləri gözləyə bilərik?
- Bizim sığorta fondu yaratmaq ideyamız var. Çempionat iştirakçılarının hər biri mövsümün əvvəlində bizə 300 000 manat məbləğində bank zəmanəti təqdim edəcək. Biz bu pulun sığorta fonduna getməsini istəyirik. Toplanan pul da Klublar Komitəsinin icazəsi ilə xərclənəcək.
- Sizə elə gəlmir ki, Klublar Komitəsi Peşəkar Futbol Liqasına əks qurumdur?
- Mən artıq bir neçə dəfə bunun belə olmadığını açıqlamışam. Əgər hansısa klub çempionatı tərk edirsə, bu, PFL-in problemi deyil. Əgər klub rəhbərləri futbolçlarına maaş ödəməkdən imtina edirlərsə, bu, Ramin Musayevin problemi deyil.
