Tərlan Əhmədov: Hədəf Avropa Liqasına vəsiqə qazanmaqdır
AZAL-ın baş məşqçisi Tərlan Əhmədovun azerisport.az saytına müsahibəsi
- Hazırlıq prosesi necə keçdi?
- Normal hazırlıq keçdik. Zədəli futbolçumuz yoxdur. Təəssüf ki, Eduardo ilə Oskar Klava qarşıdakı çempionat oyununda bizə kömək edə bilməyəcək. Amma bütövlükdə, komandanın nəyə qadir olduğunu çempionatın gedişi göstərəcək.
- Sizdən fərqli olaraq, xaricdə təlim-məşq toplanışı keçən, daha yaxşı komandalarla yoxlama oyunu keçirmiş klubların daha yaxşı hazır olduğunu demək olar?
- Razı deyiləm. Düzdür, biz yaxşı rəqiblərlə oynaya bilmədik. Amma əsas odur ki, futbolçular nələrin üzərində çalışmalı olduğumuzu bildilər. Bu baxımdan bizdə problem yoxdur. Psixoloji baxımdan da komandamda hər şey qaydasındadır. Bu, fiziki hazırlıqdan az əhəmiyyət kəsb etmir. Türkiyəyə getməməyimiz zəif hazırlaşmağımız demək deyil.
- Hər halda birinci divizion klublarına qarşı yoxlama oyunu keçirmək komandanız üçün böyük üstünlük deyil. Razısınız?
- Razıyam. Oyunlar da göstərdi ki, futbolçular birinci divizion klublarına qarşı oyunlarda xüsusi motivasiya ilə oynamırdılar. Rəqiblərə yuxarıdan aşağı baxırdılar. Amma Türkiyədə toplanış keçməyin də komanda üçün xüsusi üstünlük olduğunu düşünmürəm.
- Komandanı gücləndirə bilmisiniz?
- "Neftçi"dən Nicat Qurbanovu icarəyə götürmüşük. Aleksandr Şemonayev qayıdıb. Ukraynalı mərkəz yarımmüdafiəçisi Valeri Kutsenkonu dəvət etmişik. Daha bir "stopper" almaq istərdik. Amma hələ bu, alınmır. Əlimizdə olan materialdan yararlanmağa çalışacağıq.
- AZAL turnir cədvəlinin alt pillələrində qərarlaşıb. Bundan sonra necə olacaq?
- Rəhbərlik qarşımıza çempion olmaq, ilk üçlüyə düşmək kimi hədəf qoymayıb. Bizim konkret hədəfimiz dördüncü pilləyə yüksəlmək, Avropa Liqasına vəsiqə qazanmaqdır. Komandanın potensialı var və bu hədəfə çatmağın da mümkünlüyünə inanıram.
- Qarşıda "Neftçi" kimi kifayət qədər güclü rəqiblə oyun var...
- Kifayət qədər güclü? Mən də futbol oynamağa bu klubda başlamışam. Onlar fərdi cəhətdən güclü futbolçulara malikdilər. Öz oyunumuzu sərgiləməyə və üç xal qazanmağa çalışacağıq.
- "Neftçi"nin iki il əvvəlki dövrü ilə müqayisədə zəiflədiyini demək olar?
- Ola bilər ki, hansısa amillərə görə elə təəssürat yaransın. Amma "Neftçi" elə "Neftçi"dir. Bu komanda həmişə güclü və təhlükəli olub.