Emin Quliyev: Premyer Liqamızda azarkeşləri stadiona gətirəcək baxımlılıq yoxdur
Azərbaycan yığmasının sabiq yarımmüdafiəçisi Emin Quliyevin azerisport.az saytına müsahibəsi
- Siz hələ də işsizsiniz?
- Təəssüf ki, hələ heç bir təklif yoxdur.
- Hətta "Xəzər Lənkəran"dan da zəng edən yoxdur?
- Hələ yox. Gözləyirəm (gülür).
- Bu klubdakı son dəyişiklikləri necə qarşıladınız?
- Normal. Legionerlər fayda vermirdilər. Belədə onları saxlamağın nə mənası vardı? Yerli futbolçulara şans vermək daha yaxşıdır.
- Sizə elə gəlmir ki, futbolumuz daha bir iddialı klubu itirdi?
- Bunun belə davam edəcəyini düşünmürəm. Yayda hər şey yaxşıya doğru dəyişə bilər.
- Siz də "Qarabağ"ı çempionluq yarışında favorit sayırsınız?
- Onlar hər şeyə görə rəqiblərini üstələyirlər. Komandada titulunu qorumaq üçün hər şey var. "İnter"lə "Neftçi" bu yolda onlarla rəqabət aparmağa çalışacaq. Amma bu rəqabətin effektli olacağına şübhə edirəm.
- Çempionatımızın səviyyəsi aşağı düşməkdədir. Sizcə, bunun səbəbi nədir?
- Azarkeşləri stadiona yalnız baxımlı oyun gətirə bilər. Məsələn, "Neftçi" ilə "Xəzər Lənkəran" arasındakı oyunları götürək. Bu oyunları hamı gözləyir. Klublarımızın iddiasını, büdcəsini azaltması, gəncləşdirməyə üstünlük vermələri az təsir göstərmir.
- Əvvəllər futbolçuya baxmağa gəlirdilər...
- Hə, eləydi. Biz oynadığımız dövrdə insanlara bilet çatdırmaq olmurdu. İndi oyunlar boş tribunalar qarşısında keçirilir.
- Məsələn, siz növbəti turda hansı oyuna gedərdiniz?
- Təəssüf ki, mənim gözlədiyim qədər maraqlı bir oyun yoxdur. Ümid edirəm ki, bundan sonra vəziyyət düzələcək. Çempionatın səviyyəsi azarkeşlər olmadan qalxa bilməz. Onlara da baxımlı oyun lazımdır. Premyer Liqamızda isə hələ o baxımlılıq yoxdur.