Pavel Paşayev: Azərbaycan millisində məmnuniyyətlə oynayaram
Ukraynanın "Metallurq" klubunun qapıçısı Pavel Paşayevin azerisport.az saytına müsahibəsi
- "Xəzər Lənkəran"la yoxlama oyununda komandanız 2:1 hesabıyla qalib gəldi. Rəqib necə təsir bağışladı?
- Azərbaycan komandası mənim çox xoşuma gəldi. Sürətli oynamağa çalışırdılar. Çox diqqətli və ağıllı komandadır. Oyun da pis alınmadı. Amma biz hələ tam hazır deyilik. Gündə üç dəfə məşq edirik. Bir gündə iki məşq olanda, bizim üçün bayrama çevrilir.
- "Metallurq"da icarə əsasında oynayırsınız?
- Xeyr, klubumla müqaviləm var. Müddəti iyunda başa çatacaq. Ondan sonrasına baxacağam.
- AFFA-dan sizinlə maraqlanan olub?
- Bir neçə dəfə maraqlanıblar. Amma hamısı elə danışıq səviyyəsində olub.
- Azərbaycan yığmasında oynayarsınız?
- Məmnuniyyətlə oynayardım.
- Bu məsələ ilə bağlı sonuncu dəfə sizə nə vaxt müraciət olunub?
- Yadımda deyil. Bəlkə də bir il olar. Detallarına qədər xatırlamıram. Daha çox menecerimlə söhbətləşiblər.
- Ukrayna yığmasına dəvət alsanız da, sonradan bu komandada görünmədiniz. Niyə?
- Mənə dəvət göndərsələr də, hər dəfə debütümə hansısa problem əngəl olurdu. Sonradan ümumiyyətlə dəvət göndərmədilər.
- Ona görə Azərbaycan yığmasında oynamaq istəyirsiniz?
- Azərbaycan yığmasında oynamağı çox istəyirəm. Əgər çağırsalar, yüz faiz gələrəm.
- Azərbaycan millisinin oyunlarına baxmısınız?
- Bəzilərinə. Azərbaycanın kifayət qədər güclü komandası var.
- Valideynləriniz bu barədə sizə nə məsləhət görüb?
- Atam azərbaycanlıdır. O da istəyir ki, mən bu ölkənin yığmasında çıxış edim. Hərdən zarafat da edir ki, kimdir səni ora aparan, Azərbaycanda daha yaxşı futbolçular var.
- Bakıda olmusunuz?
- Çoxdan. Amma bu yay yenidən gəlməyi planlaşdırıram. Atam oradan yenicə qayıdıb. Oralar çox xoşuna gəlib.