Vanderson Skarduelli: Qarabağa qalib gəlmək üçün əlimizdən gələni edəcəyik
"Xəzər Lənkəran"ın yarımmüdafiəçisi Vanderson Skarduelli Topaz Premyer Liqasının 17-ci turu çərçivəsində qarşılaşacaqları "Qarabağ"la oyun öncəsi fikirlərini açıqlayıb. Azerisport.az saytına müsahibəsində o, bunları söyləyib:
"Bizi çox çətin oyun gözləyir. Rəqib kifayət qədər güclü komandadır. Onlar bunu avrokuboklardakı çıxışı ilə də sübut ediblər. Yaxşı hazırlaşmağımız lazımdır. Kiçik fasilədən sonra yenidən ev oyunumuzu Lənkəranda keçirəcəyik. Azarkeşlərimiz bizi hər oyunda dəstəkləyirlər. "Qarabağ"ı məğlub etmək üçün əlimizdən gələni edəcəyik. Son turda "Bakı"ya qalib gələ bilmədik. Həmin oyunda sadəcə, qol vurmağımız mümkün olmadı. Halbuki, 3 qol vurduğumuz "Qəbələ" ilə görüşdə də eyni taktika ilə oynamışdıq. Görünür, həmin görüşdə daha istəkli çıxmışdıq. "Bakı" ilə oyunda isə hər şey fərqli alındı. Hər şeyi unudub qarşıdakı oyuna köklənməliyik. Bu oyun daha vacibdir. "Xəzər Lənkəran"ın futbolçularının maaşlarını ala bilməməsi barədə yayılan xəbərlər düz deyil. Maaşlarımız ödənilir. Rəhbərlik sağ olsun. Bu xəbərlər bizə qətiyyən təsir göstərmir. Bütün fikrimiz qarşıdakı oyunlara yönəlib".