Emil Balayev: Ayntraxtda oynamağa hazıram
"Neftçi"nin qapıçısı Emil Balayevin azerisport.az saytına müsahibəsi
- Almaniya klubundan aldığınız təklif haqda nə deyə bilərsiz?
- Gənc futbolçu kimi, təbii ki, "Ayntraxt"dan gələn təklifə sevindim. Bu, mənim karyeramda çox vacib bir şansdı. "Xəzər Lənkəran"la oyundan dərhal sonra Almaniyaya yollanacam.
- Dəvətin detalları barədə açıqlama verə bilərsiz?
- Düzünü deyim ki, detallar haqda o qədər də məlumatım yoxdu. Çünki "Ayntraxt" birbaşa "Neftçi" rəhbərliyi ilə danışıqlar aparır. "Neftçi"nin futbolçusu olduğuma görə, klub rəhbərliyinin dediyi kimi hərəkət edəcəm. Onlar məni həm saxlaya, həm də göndərə bilərlər. Hazırda mənə özümü Almaniya klubunda göstərmək imkanı yaradıblar. Baxaq, görək necə alınacaq.
- Özünüzü ölkə xaricində oynamağa hazır hesab edirsiz?
- Niyə də yox? Bu, mənim üçün böyük üstünlükdü. Əgər onlar daim məni əsas heyətdə oynatmaq istəyirlərsə, hazıram. Azərbaycanı, mənə doğma olan "Neftçi"ni Avropanın güclü çempionatlarndan birində təmsil etmək istəyirəm.
- "Neftçi" ilə müqavilənizin müddəti nə vaxta qədərdi?
- Dekabrın sonunda başa çatacaq.
- Yeni müqavilə təklif olunmayıb?
- Hələ belə bir danışığımız olmayıb. Amma "Neftçi" mənim üçün doğma klubdu. Bu, bizim üçün problem deyil.
- Son dörd turda əsas heyətdə meydana çıxırsız. Artıq demək olar ki, komandanın bir nömrəsi siz olmusuz?
- Hər şey baş məşqçinin qərarından və mənim sərgilədiyim oyundan asılıdı. Əgər baş məşqçi şans versə, "Xəzər Lənkəran"la oyunda da özümü göstərməyə çalışacam. "Neftçi" Azərbaycan futbolunun flaqmanıdı və belə bir komandada oynamaq böyük məsuliyyət tələb edir.
- "Xəzər Lənkəran"la oyundan nə gözləyirsiz?
- Vacib oyundu. Qapıçılar üçün xüsusi konsentrasiya lazımdı. "Simurq"a məğlubiyyətdən sonra prinsipial rəqibimizə qalib gəlməklə vəziyyəti düzəltmək istəyirik.
