Riçard Almeyda: Qarabağ Reynaldosuz da Fransadan qələbə ilə qayıda bilər
"Qarabağ"ın futbolçusu Riçard Almeyda AZAL ilə oyundan sonra jurnalistlərin suallarına cavab verib. Azerisport.az sizi həmin müsahibə ilə tanış edir.
- AZAL ilə oyun barədə danışardınız. Bu matçda "Qarabağ" maksimum gücünü nümayiş etdirmədi..
- Biz hər oyuna yaxşı hazırlaşmağa çalışırıq. Rəqib kifayət qədər yaxşı heyətə malikdir. İstəyirdik səfər ərəfəsində qələbə qazanaq. Sözsüz qələbə çətin əldə edildi. Müəyyən itkilərimiz var. Bu itkilər oyunumuza təsir edir. Üstəlik cəmi 2 gün fasilə oldu və növbəti oyuna qədər rahat dincəlmək mümkün olmadı. Bununla belə qələbə qazandığımıza görə sevinirəm.
- Ola bilər ki, əsas gücünüzü Avroliqaya saxlamısınız?
- Bu gün üçün əsas məqsəd AZAL-ı məğlub etmək idi. Bundan sonra Avroliqa matçı haqda düşünəcəyik. Biz hər rəqiblə oyunda maksimum nəticə qazanmağa çalışırıq.
- Reynalndonun vəziyyəti nə yerdədir. Yəqin onun durumu barədə məlumatlısan...
- Reynaldonun zədələnməsi əhvalımızı korladı. Biz hər bir futbolçumuzun bizimlə olmasını istəyirik. Onun olmaması pis haldır. Amma "Qarabağ" da komanda ruhu var. Biz hər matçda komanda oyununu göstərməyə çalışırıq. Bir futbolçudan asılı olmarıq.
- Reynaldo olmayan matçlarda komanda zəif təsir bağışlayır. Fransada Reynaldo olmadan mübarizə aparmaq mümkün olacaq?
- Fikrimcə biz Reynaldo olmadan belə qələbə qazana bilərik. Əsas istəyimiz yaxşı oyun sərgiləməkdir. Səfərdəki oyun çətin olacaq. Biz Sent Etyenlə Fransada oynamağa hazırıq. Ona görə Reynaldo olmasa şanslarımızı azaltmayaq. Reynaldo komandanın əsas futbolçularından biridir. O yoxdusa onu əvəzedəcək başqa oyunçumuz var.
- Səfərdə hansı nəticə komanda üçün qənaətbəxş olacaq?
- Biz hələ Sent Etyenlə oyuna hazırlığa başlamamışıq. Ona görə fikir söyləmək çətindir. Baş məşqçimizin dediklərini etməyə çalışacayıq. İstəyirik Bakıya yaxşı nəticəylə qayıdaq. Məşqçilər tərəfindən əsas məqsəd nə qoyulacaqsa biz də onu yerinə yetirməyə çalışacayıq. Meydanda istəyimiz odur ki, Sent Etyenlə ən azı Bakıdakı kimi yaxşı mübarizə göstərək.
- AZAL ilə oyunda stadionda azarkeş çox az idi. Avroliqa matçlarında 32 min, çempionatda isə cəmi 2 min azarkeşin qarşısında oynamaq fərqli hisslərdir..
- Meydana çıxarkən bizi dəstəkləyən insanları görürük. Amma oyun başlayanda hamını unuduruq, fikrimiz mübarizəyə köklənir. Azarkeşləri görmürük. Əlbəttə, istərdik hər oyunda azarkeş çox olsun. Bununla belə bizim məqsədimiz hər matçda qələbə qazanmaqdır. Bilirik ki, azarkeşlərimiz bizdən uğur gözləyir.
