Vüqar Nadirov: Dneprlə Bakıdakı oyun daha çətin olacaq
"Qarabağ"ın hücumçusu Vüqar Nadirovun azerisport.az saytına müsahibəsi
- "Dnepr"lə oyun sizdə necə təəssürat yaratdı?
- "Dnepr"in güclü komanda olduğunu öncədən də bilirdik. Amma biz baş məşqçi Qurban Qurbanovun bütün tapşırıqlarını yerinə yetirə bildik və qalib gəldik.
- Baş məşqçinizin əsas tapşırığı nədən ibarət idi ki?
- Mərkəzi zonanı bağlamaq və rəqibi qapımıza yaxın buraxmamaq. Bir-birimizi sığortalamalıydıq. Bunu da etdik.
- Oyundan öncə sizi bir xalın da qane etdiyini deyirdiz...
- Səfərdə oynadığımıza görə əsas hədəfimiz məhz uduzmamaq idi. Amma qələbə bizi daha çox sevindirdi.
- Muarem Muarem qol vuranda ondan ötürmə gözləyirdiz və ya hiss edirdiz ki, özü fərqlənəcək?
- Elə alındı ki, o, bir hərəkətlə iki müdafiəçidən sıyrılıb qol vura bildik. Ötürmə gözləyirdim, amma həmin epizodda başa düşdüm ki, Muarem özü zərbə endirməyə hazırlaşır. Əsas odu ki, onda qol vurmaq alındı.
- Əlinizdən zədə aldığınız epizodda "Dnepr"in futbolçuları topu meydandan çıxarmadılar...
- Mənə elə gəlir ki, belə bir addım "Dnepr" kimi komandaya yaraşmadı. Biz heç vaxt elə hərəkət etmirik. Büdrəyəndə əlim altımda qaldı, ağrı hiss etdim. Amma rəqib futbolçular buna əhəmiyyət vermədilər. Onların heyətində hansısa futbolçu zədələnsəydi, bir topu dərhal meydandan uzaqlaşdırardıq.
- Bununla bağlı "Dnepr"in futbolçuları ilə danışdız?
- Bəli. Onlar da bildirdilər ki, bu, futboldu, belə şeylər olur.
- "Dnepr"in oyunçularından biri bu məğlubiyyəti xoşagəlməz adlandırıb...
- İstənilən məğlubiyyət xoşagəlməzdi. Onlar bizi yaxşı analiz etmişdilər. Amma biz hər şeyə rəğmən Kiyevə xal üçün getmişdik.
- Bakıdakı oyundan nə gözləyək?
- Bu komanda ilə cavab oyunumuz Kiyevdəkindən daha çətin olacaq.
- "Qarabağ" yenə ehtiyatlı oyuna üstünlük verəcək?
- Bunu indidən deyə bilmərəm.
- "Qarabağ"ın qrup mərhələsini ikinci pillədə bitirməsi nə dərəcədə realdı?
- Buna nail olmağı çox istəyirik. Ona görə də heç bir halda arxayınlaşmaq olmaz.