Markeviç: Qarabağ nəsə etməyimizə imkan vermədi
Ukrayna “Dnepr”inin baş məşqçisi Miron Markeviç Avropa Liqasının qrup mərhələsi çərçivəsində keçirilən “Qarabağ” matçından sonra jurnalistlərin suallarını cavablandırıb. Azerisport.az xəbər verir ki, təcrübəli mütəxəssis evdəki (Kiyev) 0:1 hesablı məğlubiyyəti belə şərh edib:
- Belə təəssürat yarandı ki, “Dnepr”in futbolçuları Avropa Liqasından çox çempionatı düşünür...
- Komandam çempionata daha yaxşı köklənir, amma Avropa Liqası... Ola bilər ki, bu evdə oynamamağımızla da bağlıdı. Belə geniş stadionda boş tribunalar qarşısında oynayırıq. Əlbəttə ki, belə olmağını istəməzdik. “Qarabağ” qalib gəlməyi daha çox istədi.
- Bakıdakı oyunda “Dnepr”in şansını necə dəyərləndirirsiz?
- Bakıdakı oyuna kimi “Dinamo” ilə kubok matçımız var. Bunlar bizim üçüçn önəmli matçlardı. Bakıya gedəndə görək necə olacaq.
- “Qarabağ”la bağlı sizdə necə təəssürat yarandı? Bu komandanı hansı klubla müqayisə edərdiz?
- Bir oyundan sonra belə müqayisə aparmaq çətindi. Onların yaxşı təşkil olunmuş komandası var. Onu deyə bilərəm ki, bu gün ən pis oyunumuzu göstərdik. “Qarabağ” müdafiədə çox yaxşı oynadı və nəsə etməyimizə imkan vermədi. Onlar yaxşı imkanlar yaratdı. Bu komandadan xoşum gəldi.
- Ola bilər ki, rəqibə lazımı dəyəri vermədiz?
- Ola bilər. Baxmayaraq ki, “Qarabağ” yaxşı komanda olduğunu göstərdi, yenə də lazımı diqqəti göstərə bilmədik. Onlar “Sent-Etyen”i də udmalı idi.
- Niyə komanda şəklində oynaya bilmədiz?
- Soyunub-geyinmə otağında onlara (futbolçularıma) dedim ki, komanda şəklində oynaya bilmirsiz. Bunun üzərində çalışacağıq.
- Oyun zamanı futbolçularınız feyr-pley qaydalarına əməl etmədilər. Bunu necə şərh edərdiz?
- Əgər orada ciddi zədəli olsaydı, dərhal diqqət edərdilər. Oyunçu yıxılır, hakimə baxırlar. Əgər o, oyunu dayandırmırsa, davam edirlər. Həmin vaxt “Qarabağ”ın futbolçuları da topu kənara vurmadı. İdmanda mübarizə olmalıdı.
