Qurban Qurbanov: Dneprin lider olması da bizim üçün əlavə motivasiyadı
"Qarabağ"ın baş məşqçisi Qurbanovun azerisport.az saytına müsahibəsi
- "Dnepr"lə oyun öncəsi vəziyyət necədi?
- Bütövlükdə, pis deyil. Çalışırıq ki, oyuna qədər hər şey qaydasında olsun. Amma bəzi itkilərimiz var.
- Danilo Dias oynaya biləcək?
- O, hələ fərdi məşqlər edir. Riçard Almeyda da yüngül proqram üzrə hazırlaşır. Kiçik problemlərimiz var. Amma fikrimcə, oyuna kimi hər şey düzələr.
- Milana komandanız oyundan üç gün öncə getmişdi, Kiyevə isə oyundan bir gün əvvəl. Bu, nə ilə əlaqədardı?
- Gərgin qrafik səbəbindən məhz belə addım atmalı olduq. Tez getməkdə bir məna görmürəm. Bunun oyunumuza təsir edəcəyini də düşünmürəm. Oyun günü Kiyevdə bir məşqə çıxacağıq və bu, bizə bəs edəcək.
- "Dnepr"i nə dərəcədə yaxşı tanıyırsız?
- Təəssüf ki, rəqibi yaxşı tanımaq mümkünsüzdü. Onlar hər oyunda heyəti, taktikanı dəyişə bilirlər. Amma müəyyən məlumatlar toplaya bilmişik.
- Bu komandanın Ukrayna Premyer Liqasında "Dinamo" və "Şaxtyor" kimi komandalardan öndə qərarlaşması sizi qorxutmur?
- Əksinə, Ukrayna çempionatının liderinə qarşı oynamaq xoş olacaq. Bu da əlavə bir motivasiyadı.
- Bu oyunu qrupdan çıxmaq baxımından həlledici saymaq olar?
- Üç xallıq sistemdə hər şey ola bilər. Rəqiblərimizin də neçə xal toplamasından çox şey asılıdı.
- Yəqin ki, heç-heçə sizi qane edəcək?
- Oyunun necə keçəcəyindən asılıdı. Mümkündü ki, oyundan sonra bu nəticəyə sevinək. Ya da bunun əksi olsun. Hər şeyə hazır olmaq lazımdı.