Rəşad Sadıqov: Ukrayna səfəri Qarabağ üçün qrupda ən çətini olacaq
Futbol üzrə Azərbaycan yığmasının və "Qarabağ"ın kapitanı Rəşad Sadıqovun azerisport.az saytına müsahibəsi
- "Qəbələ" üzərindəki qələbə ilə bağlı nə deyə bilərsiz?
- Çətin olacağını bilirdik. 20 gün idi birgə məşq etmirdik. Əlbəttə, bu, oyunumuza təsirini göstərdi. Zədəlilər də var idi. Reynaldo da "İnter"lə qarşılaşmada zədə almışdı, amma bunu heç kim bilmirdi. Demək olar ki, bircə gün məşq etmişdi. "Qəbələ" çox yaxşı oynadı, əks-hücumlarla yadda qaldı.
- Qarşıda Ukrayna "Dnepr"i ilə oyun var. Bu oyun Milan "İnter"i ilə görüşdən daha çətin ola bilər?
- Əlbəttə, çətin olacaq. "İnter" daha sakit və səbrli oynayırdı. "Dnepr" isə aqressiv çıxış edəcək, pressinq tətbiq edəcək. Yaxşı hücum potensialı var. Mən hələ öncədən demişdim ki, Ukraynaya səfər "Qarabağ" üçün ən çətini olacaq. Amma hər şeyə rəğmən orada yaxşı futbol sərgiləmək istəyirik.
- Berti Foqtsun gedişi sizin üçün nə dərəcədə gözlənilməz oldu?
- Düzünü desəm, gözlənilməz oldu. Əlbəttə, Xorvatiyaya məğlubiyyət ağır idi. Amma hamı onun üçün vuruşdu. Bu məğlubiyyətə görə bütün məsuliyyəti yox, həm də biz daşıyırıq. Futbolda adətən ən böyük məsuliyyəti baş məşqçi üzərinə götürür. Altı il müddətindəki fəaliyyətinə görə Foqtsa təşəkkürümü bildirirəm. Karyeramın yarısını onun rəhbərliyi altında keçirmişəm. O, mənə həmişə inanıb.
- Qurban Qurbanovun milliyə gəlməsi realdı?
- Yığma başqa, "Qarabağ" başqadı. İndi bu barədə danışmaq istəmirəm. Hazırda bir şeyi bilirəm ki, bizi Norveçlə oyuna Mahmud Qurbanov çıxaracaq. Qalanına AFFA qərar verəcək.