Muarem: Neftçidən daha yaxşı oynayıb, İnterə qalib gəlməyə çalışacağıq
"Qarabağ"ın yarımmüdafiəçisi Muarem Muaremin azerisport.az saytına müsahibəsi
- Yəqin ki, Avropa Liqasının qrup mərhələsi çərçivəsində "İnter"lə oyuna yaxşı əhval ruhiyyədə yollanırsız. Son turda "Neftçi"yə qarşı oyunun ikinci hissəsində meydana çıxsaz da, qol vurduz...
- Baş məşqçi mənə nə vaxt güvənirsə, o vaxt meydana çıxıram. Bu zaman əlimdən gələnin ən yaxşısını etməyə çalışıram.
- Milanda legioner limiti olmayacaq və güman ki, siz də oynayacaqsız. İki futbolçunuzun zədəli olması da sizin şansınızı artırır...
- Ümid edirəm. Belə oyunlarda hamı oynamaq istəyir. İlk dəqiqələrdən meydana olmağımla sonradan oyuna qoşulmağım vacib deyil. Əsas komandamızın yaxşı çıxışıdı.
- "Neftçi" ilə oyunun ikinci hissəsi göstərdi ki, siz artıq "İnter"lə oyunu düşünürsüz...
- Ola bilər. Hər halda bu görüş çempionat oyunundan daha vacibdi.
- Milanda komandanızdan nə gözləyək?
- Çətin oyun olacaq. Amma biz bura uduzmağa gəlməmişik. Ümid edirəm ki, yaxşı çıxış edib, uğurlu nəticə qazanacağıq.
- İki il öncə "Neftçi" Milanda bu komanda ilə 2:2 hesablı heç-heçəyə imza atmışdı...
- Ümid edirəm, biz daha yaxşı oynayıb, qələbə qazanarıq (gülür).
- "Qarabağ"a iki cəbhədə oynamaq çətin deyil?
- Avroliqada çıxış edirik deyə, Premyer Liqanı unuda bilmərik. Gec-tez Avroliqadakı çıxışımız başa çatacaq. Amma TPL-də oynamağa yenə davam edəcəyik. Ona görə əsas rəqiblərimizi çox uzağa buraxmaq olmaz.