Riçard Almeyda: Neftçi ilə oyun göstərdi ki, Qarabağda əvəzolunmaz futbolçu yoxdu
"Qarabağ"ın yarımmüdafiəçisi Riçard Almeyda Topaz Premyer Liqasının 7-ci turu çərçivəsində "Neftçi" üzərində 3:1 hesablı qələbədən sonra azerisport.az saytının suallarını cavablandırıb:
- "Neftçi" üzərində qələbə çətin alındı?
- Bəli. Belə olacağını bilirdik. Mənə elə gəlir ki, "Qarabağ" bu gün daha yaxşı oynadı. Komanda yoldaşlarımı qələbə münasibətilə təbrik edirəm.
- Çumbinyo və Danilo Diasın yoxluğu hiss olunurdu?
- Bizim onları əvəzləyəcək futbolçularımız var. Çumbinyo ilə Dias bizə lazımlı futbolçulardı. Amma "Neftçi" ilə oyun göstərdi ki, bizdə əvəzolunmaz futbolçu yoxdu.
- "Neftçi" sizə qarşı çox kobud oynayırdı...
- "Neftçi"nin belə oyun tərzinə üstünlük verdiyini öncədən də bilirdik. Bu, futboldu, başqa nəsə gözləməyə də dəyməzdi. Əsas odu ki, oyun göstəricilərinə görə rəqibi üstələyə bildik.
- Sizin növbəti oyununuz Milan "İnter"inə qarşı olacaq. Həmin oyundan nə gözləyirsiz?
- Bu gün sərgilədiyimiz oyunu "İnter"lə görüşdə təkrarlamaq bizə çətin olacaq. İtaliya təmsilçisi tamamilə fərqli səviyyədə bir komandadı. Amma Milanda da yaxşı oynamağa çalışacağıq.
- Bu yaxınlarda məlum oldu ki, Reynaldonun Azərbaycan yığmasında oynaması mümkün olmayacaq...
- Mənə elə gəlir ki, onun Azərbaycan yığmasında oynaması hər kəs üçün yaxşı olardı. AFFA onun milliləşdirilməsinə nail olmaq üçün əlindən gələni etməlidi.