"Qarabağın oyununu görəndən sonra başa düşdüm ki, çox çətin qrupa düşmüşük"
Azərbaycan çempionu "Qarabağ"ın Avropa Liqasının qrup mərhələsindəki rəqibi Ukraynanın "Dnepr" klubunun çexiyalı müdafiəçisi Andrey Mazuxun azerisport.az saytına müsahibəsi
- "Qarabağ" - "Sent-Etyen" matçına baxdız?
- Oyunun fraqmentlərinə baxmışam. Ancaq "Qarabağ" hücum edib. Komandanız çox yaxşı oynayıb.
- Kim qələbə qazanmalıydı?
- Çox hücum etməsini nəzərə alsaq, "Qarabağ". Bunun üçün gözəl şansları da olub. Amma buna nail ola bilmədilər.
- Ağdamlılardan belə oyun gözləyirdiz?
- Düzünü desəm, yox. Düşünürdüm ki, "Qarabağ" qrupun autsayderi olacaq. "Sent-Etyen"in Bakıda qələbə qazanacağını gözləyirdim. Amma gördüm ki, fransızlar heç hücum da etmədilər.
- Sizin "İnter"lə oyununuz necə keçdi?
- Uduzduğumuz üçün çox məyusam. Qələbə də qazana bilərdik. 70-ci dəqiqəyə qədər hesab açılmamışdı. Amma buraxılan qol bizi psixoloji cəhətdən "sındırdı".
- Bəs 70 dəqiqə ərzində sizin qol vurmağınıza nə mane oldu?
- İlk oyun idi. Həm də ələ düşən şansalrdan lazımınca yararlana bilmədik.
- Sizcə, hansı komandalar qrupdan çıxmaq üçün oynayacaq?
- Hamının belə bir şansı var. "İnter" daha məşhurdu. Bu komandanın qrupda birinci olacağını hamı deyir. Amma mən bununla razı deyiləm. Düzdü, onlar favoritdilər. Amma "Qarabağ"ın oyununu görəndən sonra başa düşdüm ki, çox çətin qrupa düşmüşük. Hamı sonadək mübarizə aparacaq. Qarşıda daha 5 oyun var.
- "Dnepr"ə də "Qarabağ"la çətin olacaq?
- Bütün oyunlar çətin olacaq. Sizin klubla oyun da istisna olmayacaq. "Qarabağ"ın güclü hücum xətti var. Onları saxlamaq lazım gələcək.