Leroy Corc: Dneprlə İnterə də qarşı sonadək mübarizə aparacağıq
"Qarabağ"ın yarımmüdafiəçisi Leroy Corcun azerisport.az saytına müsahibəsi
- Avropa Liqasının qrup mərhələsi çərçivəsində Fransa "Sent-Etyen"i ilə oyundan sonra Azərbaycan Premyer Liqasına köklənmək çətin olmayacaq ki?
- Heç bir çətinlik yoxdu. Hər iki turnir bizim üçün eyni dərəcədə vacibdi. Yenidən avrokuboklarda oynamaq istəyiriksə, yüksək yerlərdən birini tutmağa borcluyuq.
- "Sent-Etyen"lə oyundan sonra çox məyus görünürdüz. Qələbə qazana bilmədiyinizə üzgün idiz?
- Elə heç-heçələr var ki, son dəqiqələrdə məğlubiyyətdən qaçırsan, qələbəyə bərabər olur. Elə heç-heçələr də var ki, qələbə qazanmağa layiq olduğun halda, buna nail ola bilmirsən. Bizdə də iki xal itkisi ilə üzləşdiyimiz heç-heçədən oldu. Çünki rəqibdən çox yaxşı oynadıq.
- Bəs qələbə qazanmağınız üçün nə çatmadı?
- Qol vəziyyətlərindən yararlana bilmədik. Bir az da bəxt yanımızda olmadı. Taktiki cəhətdən çox səliqəli oynadıq. Şəxsən mən rəqibin qapımız qarşısında yüz faizlik qol epizodu yaratmasını xatırlamıram. Amma qrup mərhələsindəki debüt oyunu üçün heç-heçə də normal nəticədi.
- Sizə elə gəlmir ki, Reynaldo bir neçə epizodda komanda yoldaşlarına ötürmə versəydi, qələbə qazana bilərdiz?
- Siz onun özü və komanda yoldaşları üçün neçə qol epizodu yaratdığını görmədiz? O, hər şeyi düz etdi. Reynaldo komandamızın əsas oyunçularından biridi. O da qol vurmaq istəyirdi. Bunun üçün hər şeyi etdi. Amma qonaqların qapıçısı da bu oyunu yüksək səviyyədə keçirdi.
- Rəqibdən daha güclü oyun gözləyirdiz?
- Mən onların zəif oynadığını deməzdim. Sadəcə, müdafiəyə daha çox diqqət ayırmışdılar.
- "Qarabağ" digər rəqiblərinə də qarşı belə oynaya biləcək?
- Qarşıda hələ "Simurq"la oyun var. Bu oyundan sonra baxarıq.
- Amma biz Avroliqadakı rəqiblərinizi nəzərdə tuturduq...
- Çalışacağıq. "İnter" (İtaliya) və "Dnepr"lə də sonadək mübarizə aparacağıq.