Qarabağ tarixi oyuna çıxır
Bu gün Avropa Liqasında qrup mərhələsinə start verilir. Azerisport.az xəbər verir ki, Azərbaycanın qitənin nüfuzuna görə ikinci dərəcəli klub turnirindəki yeganə təmsilçisi - son çempion "Qarabağ" da ilk sınağına çıxacaq.
Xatırladaq ki, Ağdam klubu bu mövsüm avrokuboklar macərasına Çempionlar Liqasının ikinci təsnifat mərhələsindən başlayıb. Bölgə təmsilçisinin startdakı rəqibi Malta "Valletta"sıydı. "Qarabağ" bu rəqibini səfərdə 1:0, Bakıda isə 4:0 hesabı ilə üstələyərək, adını növbəti mərhələyə yazdırdı. Üçüncü təsnifat mərhələsində isə təmsilçimiz Avstriya "Zalsburq"una uduzaraq (2:1, 0:2), ÇL ilə vidalaşdı. Lakin qaydaya görə, ÇL-in pley-off mərhələsinə vəsiqə qazana bilməyən klublar mübarizəni Avroliqanın eyni mərhələsində davam etdirmək şansına malik idi. Çempionumuz məhz bu mərhələdə ünlü Hollandiya "Tvente"si ilə çətin sınaqdan üzüağ çıxaraq (evdə 0:0, səfərdə 1:1), tarixində ilk dəfə adını qrup mərhələsinə yazırdı.
"Qarabağ"ın qrup mərhələsindəki rəqibləri İtaliya "İnter"i, Fransa "Sent-Etyen"i və Ukrayna "Dnepr"idi. İlk rəqib isə fransızlardı. Komandamız bu rəqiblə tarixi matçını Bakıda, yenilənmiş Tofiq Bəhramov adına Respublika stadionunda keçirəcək. Komandamız doğma azarkeşlər qarşısında oynayacaq ki, bu da avrokubokların qrup mərhələsindəki debüt matçda uğur qazanmağa yardımçı ola bilər.
"Sent-Etyen" 1919-cu ildə yaranıb. Bu klub Liqa 1-də əldə etdiyi 10 çempionluqla ölkəsinin ən çox uğur qazanan komandalarından biridi. Lakin "Qarabağ"ın rəqibinin sonuncu çempionluğu 33 il əvvələ təsadüf edir. Ölkə kubokunu 6 dəfə qazanan fransızların beynəlxalq arenada ən böyük uğuru o vaxtlar UEFA Çempionlar Kubokunun finalına çıxmaq olub. Həmin qarşılaşmada Almaniya nəhəngi "Bavariya"ya 0:1 hesabı ilə məğlub olan fransızlar qızıl medaldan əlini üzməli olublar. Yeni mövsümdə "Qarabağ"ın rəqibi ölkə çempionatına uğurlu başlayıb. Belə ki, Fransa çempionatının geridə qalan 5 turunda "Sent-Etyen" 3 qələbə, 1 heç-heçə, 1 məğlubiyyətlə 4-cü yerdə qərarlaşıb. Komanda 6 qol vurduğu halda, öz qapısında da eyni sayda top görüb.
Kluba Bernard Kayatso və Rolan Romeyer rəhbərlik edir. Komandanın baş məşqçisi isə Kristof Qaltedi. Oyunlarını 40 800 nəfərlik azarkeş tutumuna malik "Stade Geoffroy-Guichard" stadionunda oynayan "ağ-yaşıllılar" ötən mövsümdə 69 xal toplayaraq, çempionatı 4-cü pillədə başa vurub. Məhz bunun sayəsində Avroliqaya vəsiqə qazanan komanda birbaşa pley-off mərhələsindən mübarizəyə başlayıb. Lakin onlar Türkiyənin "Karabükspor" klubunu yalnız penaltilər seriyasında məğlub edərək qruplara qalmağı bacarıblar.
Göründüyü kimi, "Qarabağ"ın rəqibi kifayət qədər güclü klubdu. Bu üzdən də komandamızın "Sent-Etyen"lə oyunda uğur qazanması üçün daha böyük güc sərf etməsinə ehtiyac var. Qurban Qurbanovun yetirmələri maksimum diqqətli oynamaqla, ələ düşən qol fürsətlərinin hər birini dəyərləndirməklə sürpriz nəticəyə imza ata bilər. Təbii ki, ağdamlıların hətta heç-heçəyə nail olması da uğurlu nəticə sayılacaq. Amma qələbə qazanmaq şansı varkən, bunu dəyərləndirmək daha yaxşı olardı.
Sonda onu da bildirək ki, "Qarabağ"ın Avroliqada qazanacağı istənilən uğur Azərbaycanın UEFA-dakı klub reytinqinə də təsirsiz ötüşməyəcək. Belə ki, Ağdam klubunun hər bir qələbəsi ölkəmizə 0,500, heç-heçə isə 0,250 reytinq xalı qazandıracaqş Hazırda Azərbaycan UEFA reytinqində 53 ölkə arasında 30-cu pillədədi və hesabında 11.250 reytinq xalı var. Bunun 2.375 xalı cari mövsümdə qazanılıb (1.000 xal "Qarabağ"ın, 0.750 xal "İnter", qalan 0.625 xal isə "Neftçi"nin sayəsində əldə olunub).
"Qarabağ" hazırda UEFA-nın klub reytinqində 8.250 xalla 188-cidi. "Sent-Etyen" isə 12.316 xalla 133-cü pillədə qərarlaşıb.
Qeyd edək ki, F qrupu çərçivəsindəki digər oyunda "Dnepr" "İnter"i qəbul edəcək.
Avropa Liqası
F qrupu
18 sentyabr
21:00. Qarabağ - Sent-Etyen
Hakimlər: Stiven Maklin, Qeyvin Harris, Fransis Konnor, Alasdair Ross.
Əlavə köməkçi hakimlər: Brayan Kolvin, Andrey Dallas (Hakimlər Şotlandiyadandı).
Hakim-inspektor: Tor Orrason (İslandiya).
UEFA nümayəndəsi: Sergey İliç (Belarus).
Bakı. Tofiq Bəhramov adına Respublika stadionu.