Rəşad Sadıqov: Xoşdu ki, çempionatın lideri elə Sumqayıtdı
"Qarabağ"ın kapitanı Rəşad Sadıqovun azerisport.az saytına müsahibəsi
- Son ölkə çempionu ilk qələbəsini yalnız 5-ci turda qazandı...
- AZAL son turda "Qəbələ" üzərində qələbə qazandığından rəqib futbolçularda özünəinam çox idi. Bizim oyuna qədər bütün favoritlər qalib gəlmişdilər və aradakı xal fərqi artmışdı. Ona görə də bu oyun bizim üçün çox vacib idi. Bu üzdən uşaqlar yaxşı oyun sərgiləyib, çox lazımlı bir qələbəyə imza atdılar.
- Məhz "Qarabağ" üzərindəki texniki qələbədən sonra "Sumqayıt" qələbələri sıralamaqda və liderliyə davam edir...
- "Sumqayıt"ın liderliyi məni sevindirir. Onlara həmişə simpatiyam olub. Bu komanda Premyer Liqanın zəif kollektivlərindən hesab olunsa da, öz sistemləri var. Oyun üslubları da digərlərindən fərqlənir. Həmişə yaxşı futbol sərgiləməyi bacaran komandaların qələbə qazanmasını istəmişəm. İndi də "Sumqayıt"ın birinci yerdə getməsi xoşdu. Özü də onlar bu uğuru gənc mütəxəssis Aqil Məmmədovun rəhbərliyi altında qazanır.
- Sizcə, belə bir çempionatda komandanız nəyəsə nail ola biləcək. Çünki sizi eyni zamanda Avropa Liqasında da gərgin mübarizə gözləyir...
- Bəribaşdan deyim ki, biz Premyer Liqanı Avroliqaya qurban vermək fikrində deyilik. İlk turda "Sumqayıt"a texniki səhv səbəbindən uduzduq. İkinci oyunumuzda "İnter"ə qarşı yaxşı çıxış etsək də, 1 xal qazandıq. "Bakı"ya qarşı ağır Hollandiya səfərindən sonra oynadıq. Uşaqlarda yorğunluq var idi. Ona görə də məşqçilər gənc oyunçulara şans verdilər. Hesabda öndə olsaq da, sonda qələbəni əldən verdik. Şadam ki, nəhayət son turda ilk qələbəmizi qazandıq. Ehtiyatda oyunumuz olsa da, liderlərdən yenə geridəyik. Avroliqa oyunlarında çox güc itirəcəyik. 3-4 gündən bir oyuna çıxmaq çox çətin olacaq. İstənilən halda hədəfimiz qış fasiləsinə qədər liderlərdən çox geri qalmamaqdı.
- Son iki çempionat oyununda meydana çıxmamısız. Rəşad Sadıqov daha vacib oyunlar üçün qorunur?
- Bu, mənim qərarım deyil. AZAL-a qarşı oyuna hazırlaşmışdım. Amma məşqçilər məni ehtiyatda saxlamağa qərar verdilər. Buna da normal yanaşdım.
- Mərkəzi arenaya yeni qazon döşənir. Bu xəbəri komandanız necə qarşıladı?
- Baxaq, görək necə qazon olacaq. Məncə, hələ yeni qazonun tam yaxşılaşması üçün 10-15 gün lazımdı. Bizim oyuna qədər nə dərəcədə ideal olacağını deyə bilmərəm. Belə qazonlarda oynamışıq. Həddən artıq yumşaq olurlar. Təbii ki, qazonun yenilənməsi sevindiricidi. Ümid edirəm ki, bu, bizim oyunumuza yaxşı təsir edəcək.
- Dolu stadion, gözəl qazon, fransız "Sent-Etyen"i... Sentyabrın 18-i Azərbaycan futbolu üçün tarixi bir gün ola biləcək?
- Bu matçın bütün ölkə üçün vacib olduğunu anlayırıq. Biz də öz növbəmizdə hazırlaşırıq, əlimizdən gələni edirik ki, bu oyunda yaxşı nəticə qazanaq. Amma nəzərə almaq lazımdı ki, rəqib çox güclüdü. Elə Fransa çempionatındakı nəticələrinə baxmaq yetərlidi. Çox güclü qrupa düşmüşük. Biri 5, digəri 7 qol vurur.
- Razısız ki, "Qarabağ"ın qrup mərhələsinə "Sent-Etyen"ə qarşı oyunla start verməsi ən uyğun variantdı?
- Mənim üçün hər üç rəqibimiz eyni dərəcədə güclüdü. Amma ilk oyun həmişə çox vacibdi. Daha sonra bizi "İnter" və "Dnepr"lə çətin səfər oyunları gözləyir.