Aqil Məmmədov: Heç kim bizim haqqımızı yeməsin
"Bakı"nın qapıçısı Aqil Məmmədovun azerisport.az saytına müsahibəsi
- "Qarabağ"la heç-heçəyə (2:2) nail olduz, ilk xalınızı qazandız. Oyun haqda fikrin necədi?
- Oyun yaxşı keçdi. Düzdü, birinci hissədə "Qarabağ" bir az bizi sıxdı. Amma ikinci hissə toparlandıq. Uşaqların özündə inam göründü. Futbolda ad-sanın önəmli olmadığı göründü. Sona kimi oynadıq. Biz qələbə də qazana bilərdik. Həqiqətən iki xal itirdik. Qələbəyə layiq idik. Sadəcə, oyundan qabaq uşaqlar "Qarabağ"dan çəkindi. Fikirləşdilər ki, rəqib Avroliqada oynayır. Sonra gördülər ki, yox oynamaq olar onlarla. Oynadıq, qələbəyə də yaxın olduq. Ancaq olmadı. Qarşıdakı oyunlara baxacağıq.
- Bəzi epizodları qolla nəticələndirə bilmirsiz. Bu, təcrübəsizlikdən irəli gəlir?
- Bəli, təcrübəsizlik öz sözünü deyir. Məsələn, Muarem Muaremi gördüz, bir epizod oldu, onu da vurdu.
- Yeri gəlmişkən, həmin epizodda Muaeremin zərbəsinin qarşısını ala bilməzdiz?
- Həmin epizod fərqli alındı. Çünki top birbaşa üstümə gəlmirdi. Üstümə gəlsəydi, tutardım. Sadəcə, qarışıqlıq yarandı və top Muaremin qarşısına düşdü. O da tez döndü, vurdu. Təcrübəsini göstərdi.
- Demişdin ki, "Bakı" çempionatda ən baxımlı oyun göstərən komandalardandı. "Qarabağ" qarşısında nümayiş etdirdiyiniz oyundan sonra da fikrində qalırsan?
- Bəli. "Bakı" gözəl oynayır. Bu oyun sübutdu. Bu gün azacıq nəsə çatışmadı. O da təcrübəsizlik. Bzim oyunçular da səviyyəlidi. Sadəcə, təcrübəsizlik qol epizodlarında öz sözünü deyir.
- Hakimlik haqda nə düşünürsən?
- Hakimliklə bağlı danışmaq istəmirəm. Bu, düzgün olmazdı.
- Referilər bəzi epizodlarda sanki "Qarabağ"a simpatiya göstərirdi...
- Heç kim elə bilməsin ki, "Bakı" küçə komandasıdı. "Bakı" hər zaman Azərbaycan futboluna öz töhvəsini verir. İndi də cavan heyətimiz var. Bu da Azərbaycan futbolunun xeyrinədi. Buna dəstək olmaq lazımdı. Bizə heç kim badalaq vurmasın. Kim badaqla vursa, cavabını alacaq.
- Hər halda etiraf etmək lazımdı ki, əksər epizodlarda hakim "Qarabağ"ı bağışlayırdı. Bu, nədən irəli gəlirdi?
- "Qarabağ" Azərbaycan çempionudu və Avropa Liqasında da qrupda oynayacaq. Maddi cəhətdən də indi bizdən çox güclüdü. Belə götürəndə, istər-istəməz hakimin simpatiyası az da olsa, keçir o tərəfə. Hakim də insandı. Bir saniyə içində qərar verir. Səhv də edə bilər.
- Bir epizodda Vüqar Nadirov Yure Travnerə açıq-aşkar dirsək zərbəsi vursa də, hakim ona sarı vərəqə göstərməklə bağışladı...
- Razıyam. Həmin epizodda qırmızı vərəqə var idi. Yan xətt hakimi də ona qaydanın pozulduğunu dedi. Amma yenə vermədi. Ola bilər ki, baş hakimin "Qarabağ"a simpatiyası var idi.
- Hakimlərə bir neçə epizodda etiraz etdin...
- Mən haqqı tələb edirəm. Bax sora deyirlər ki, Aqil hakimlərlə mübahisə edir. Mən komandanın kapitanıyam. Bizdə hamısı cavan uşaqlardı. Onlar nə söz deyəcək hakimə? Məcbur mən deməliyəm. Axı həm də kapitanam. Ona görə də heç kim deməsin ki,Aqil getdi hakimin üstünə,nə bilim nə. Mən artıq hərəkət etmirəm. Hərəkətimi bilirəm. Sadəcə, haqqı tələb edirəm. Görürəm haqsızlıq edirlər bizə qarşı, mən də deyirəm qardaş niyə belə edirsən? Hakimə söz deyirəmsə, deməli boş yerə demirəm. Haqqımızı tələb edirəm. Hakimlərə deyirəm ki, qardaş xahiş edirəm eyni səviyyədə oyun idarə et. Nə bizə kömək et, nə də haqqımızı ye.
- Aqil, bu heç-heçə "Bakı"ya qarşıdakı turlarda təkan verə bilər?
- Biz indiyə kimi çox yaxşı oynayırıq. "Neftçi" ilə çox yaxşı başladıq. Heyf ki, uduzduq. "Qəbələ" ilə də əla oynadıq. Ancaq sonda onlar qazandı. Halbuki qələbəyə layiq biz idik. İndi də "Qarabağ"la matçda. Biz bu oyunda iki xal qoyub gedirik. Bir də söz deyim. Heç kim deməsin ki, "Qarabağ" yorğun idi. Heç kim bunu dilinə gətirməsin. Hamısı da oynadı və meydanda idilər. "Qarabağ" Avropa komandasıdı. Heç kim başlamasın ki, "Qarabağ" yorğun idi, ona görə "Bakı"nı uda bilmədi. Bu, haqsızlıq olar. Biz meydanda gözəl oynadıq və qələbəyə də yaxın idik. Heç kim bizim haqqımızı yeməsin.
- Bu heyətlə "Bakı"nın vəziyyəti necə olacaq?
- Sabahın işini bilmək olmaz. Kim bilərdi ki, "Bakı"nın belə cavanlaşdırılmış heyəti olacaq? Heç kəs. Ona görə bilmək olmaz, mövsümün yarısından sora "Bakı"nın iddiası necə olacaq. Biz rəhbərliklə danışmışıq. Anca indi maddi vəziyyət tam yaxşı deyil. İnşallah, düzələcək. Allah da bəndəsinin sıxıntıda olmasına dözməz. Yusifi quyudan çıxaran Allah bizə də bir köməklik göstərər.