Tarixi şansı qaçırmayın!
Bu gün Avropa Liqasında pley-off mərhələsinin cavab oyunları keçiriləcək. Azerisport.az xəbər verir ki, Azərbaycanın qitənin nüfuzuna görə ikinci dərəcəli klub turnirindəki təmsilçiləri - son çempion "Qarabağ"la ölkə kubokunun qalibi "Neftçi" də növbəti sınağına çıxacaq.
Xatırladaq ki, Ağdam klubu bu mövsüm avrokuboklar macərasına Çempionlar Liqasının ikinci təsnifat mərhələsindən başlayıb. Bölgə təmsilçisinin startdakı rəqibi Malta "Valletta"sıydı. "Qarabağ" bu rəqibini səfərdə 1:0, Bakıda isə 4:0 hesabı ilə üstələyərək, adını növbəti mərhələyə yazdırdı. Üçüncü təsnifat mərhələsində isə təmsilçimiz Avstriya "Zalsburq"una uduzaraq (2:1, 0:2), ÇL ilə vidalaşdı. Lakin qaydaya görə, ÇL-in pley-off mərhələsinə vəsiqə qazana bilməyən klublar mübarizəni Avroliqanın eyni mərhələsində davam etdirmək şansına malikdilər. İndi çempionumuzu bu turnirin qrup mərhələsinə düşmək yolunda Hollandiya "Tvente"si ilə çətin sınaq gözləyir.
Hansı ki, bu klub azərbaycanlı futbolsevərlərə çox yaxşı tanışdı. "Qarabağ" 2009-cu ildə ilk dəfə Avropa Liqasının pley-off mərhələsinə yüksələndə Qurban Qurbanovun komandasının bəxtinə məhz "Tvente" çıxmışdı. Həmin vaxt bu komandanı ingilis mütəxəssis Stiv Maklaren çalışdırırdı. Hollandiyada keçirilən ilk qarşılaşma Vüqar Nadirovun erkən qolu ilə yadda qaldı. Az sonra o, daha bir qol vurmağa yaxın olsa da, bundan yararlana bilmədi. Əvəzində 3 qol vuran meydan sahibləri 3:1 hesabıyla qalib gəldilər. Bakıdakı görüşdə isə qolsuz heç-heçə qeydə alındı.
Həmin dövrlə müqayisədə, "Tvente" çox dəyişib. Komandaya indi Alfred Şreyder rəhbərlik edilir. O, vaxtilə Maklarenin köməkçisi vəzifəsində çalışıb. Hollandiyalı mütəxəssis 2007/08 mövsümündə "Tvente"də futbolçu kimi çıxış edib. Amma beş il öncə "Qarabağ"a qarşı oynamış futbolçuların heç biri hazırda "Tvente"də qalmayıb. Baxmayaraq ki, Ağdam klubunda bununla bağlı vəziyyət bir qədər fərqlidi.
"Tvente" son mövsümü üçüncü yerdə başa vurub. Enshede şəhərinin təmsilçisi çempion "Ayaks" və gümüş mükafatçı "Feyenoord"dan geri qalıb. Məhz bunun sayəsində komanda Avroliqanın pley-off mərhələsində oynamaq şansı qazanıb. Yəni Hollandiya klubu mübarizəyə birbaşa məhz bu mərhələdən başlayıb. "Tvente" son mövsümdə keçirdiyi 34 oyundan 17-də qalib gəlib, 12-də heç-heçə edib və 63 xal toplayıb. Cəmi 5 görüşdə uduzan enshedelilər rəqib qapılarından 72 top keçirdikləri halda, öz qapılarında 35 qol görüblər. Hollandiya çempionatının yeni mövsümü isə bu komanda üçün uğurlu başlamayıb. "Tvente" geridə qalan üç turda eyni sayda heç-heçəyə imza atıb. Bir sözlə, komanda hələ yeni mövsümdə qələbəyə sevinməyib. 4 qol vuran komanda eyni sayda da top buraxıb.
"Qarabağ"ın budəfəki rəqibi də kifayət qədər güclü klubdu. Bu üzdən də komandamızın "Tvente" səddini keçmək üçün daha böyük güc sərf etməsinə ehtiyac var. Qurban Qurbanovun yetirmələri maksimum diqqətli oynamaqla, ələ düşən qol fürsətlərinin hər birini dəyərləndirməklə sürpriz nəticəyə imza ata bilər. Cavab matçının səfərdə keçirilməsi holandlara sərf edir. Bu üzdən komandamız ilk oyunda qeydə alınan qolsuz heç-heçə üstünlüyündən də maksimum yararlana bilər. Belə ki, ağdamlılara hətta istənilən hesablı qollu heç-heçə də sərf edir ki, mərhələ adlaya bilsin. Odu ki, komandamız bütün gücünü ortaya qoyub, rəqib qapısından mümkün qədər çox top keçirməlidi. Bu oyun ərəfəsində bütün futbolçuların sırada olması, zədəlilərin də qayıtması "Qarabağ" üçün sevindirici məqamlardandı.
Digər təmsilçimiz "Neftçi" də qrup mərhələsinə vəsiqə qazanmaq üçün köhnə tanışı ilə mübarizə aparır. Paytaxt klubu Serbiya "Partizan"ını mübarizədən kənarlaşdırmalıdı. Hansı ki, bu klub azərbaycanlı futbolsevərlərə çox yaxşı tanışdı. "Partizan" Serbiyanın ən titullu klublarından biridi. "Qarbağ"dan fərqli, "Neftçi" bu komanda ilə cəmi iki il öncə üz-üzə gəlib. Özü də Avroliqanın qrup mərhələsində. Belqraddakı ilk oyunda hesab açılmayıb. Bakıdakı qarşılaşmada isə tərəflər hərəyə bir qol vurublar. Hesabı 10-cu dəqiqədə Flavinyo açıb, 67-ci dəqiqədə isə Mitroviç görüşün yekun nəticəsini müəyyənləşdirib.
"Neftçi"nin rəqibi Serbiya çempionatının son mövsümündə yalnız əzəli rəqibi "Crvena Zvezda"dan geri qalıb. Çempion 30 oyuna 72 xal topladığı halda, "Partizan" ondan cəmi 1 (!) xal geri qalıb. 22 qarşılaşmada qalib gələn komanda 5 heç-heçə edib, 3 dəfə məğlub olub. Rəqib qapılarından 64 top keçirən komanda öz qapısında cəmi 20 qol görüb ki, bu göstəricisinə görə "Partizan" mövsümün rekordçusu olub. Bu mövsümün geridə qalan üç turunda da sözügedən komanda inamlı çıxışı ilə seçilir. Hər üç oyununda qalib gələn "Neftçi"nin rəqibi 10 qol vurub, 2 top buraxıb.
"Partizan" bu avrokuboklar mövsümünə Çempionlar Liqasından başlayıb. Serbiya çempionatını ikinci pillədə başa vuran komanda ÇL-in ikinci təsnifat mərhələsində Farer adalarının "Torshavn" klubunu iki oyunun cəminə görə 6:1 hesabıyla üstələyib. Amma üçüncü təsnifat mərhələsi çərçivəsində Bolqarıstan "Ludoqorets"i ilə oyunlar Marko Nikoliçin yetirmələri üçün uğursuz başa çatıb. Səfərdə qolsuz heç-heçəyə razılaşan serblər ev oyununda da 2:2 hesablı heç-heçədən artığına nail ola bilməyincə, ÇL-dən kənarda qalıblar. Bu oyunda Petar Şkuletiç dubla imza atıb.
Təbii ki, "Neftçi"nin budəfəki rəqibi Sloveniya "Koper"i və Gürcüstan "Çixura"sı ilə müqayisədə çox ciddi komandadı. Düzdü, son dövrlər Serbiya klubunun düşərgəsindəki maliyyə böhranı var. Amma həm çempionatdakı ardıcıl qələbələr, həm də "Neftçi" ilə ilk oyundakı əzmkar qələbə bunun komandanın çıxışına təsir etmədiyinin bariz sübutudu. Lakin istənilən halda "ağ-qaralar"ın bu rəqibini də mübarizədən kənarlaşdıra biləcəyinə inam var. Cavab oyununun Bakıda keçirilməsi də komandamızın lehinədi. Bu yolda Böyükağa Hacıyevin komandasına səfərdə vurulan 2 qol çox kömək edə bilər. Qazanılacaq uğur Azərbaycan klubunun tarixində ikinci dəfə Avroliqanın pley-off mərhələsinə vəsiqə qazanması baxımından da çox vacibdi.
Maraq üçün qeyd edək ki, "Neftçi" kimi, "Qarabağ" da bu mövsüm nəhayət qitə miqyaslı turnirlərdə qrup mərhələsinin iştirakçısı olmaq iddiasındadı. Vaxtilə "Neftçi"nin imza atdığı belə bir uğura Çempionlar Liqasında nail olmaq mümkün olmasa da, Avroliqanın qruplarına düşmək mümkündü. Bir neçə dəfə qrup mərhələsinin astanasında dayanan "Qarabağ"dan bu mövsüm gözləntilər çox yüksəkdi. Bu üzdən "Neftçi" ilə yanaşı, "Qarabağ" da belə bir tarixi şansı əldən qaçırmamalıdı. İki Azərbaycan klubunun eyni vaxtda Avroliqanın qrup mərhələsində çıxış etmək şansı qazanması futbolumuz adına çox böyük uğur olardı. Amma bu uğura nail olmaq üçün son 90, bəlkə də 120 dəqiqə ərzində çox əziyyətə qatlaşmaq lazım gələcək.
Sonda onu da bildirək ki, avrokuboklarda qazanılan istənilən uğur Azərbaycanın UEFA-dakı klub reytinqinə də təsirsiz ötüşmür. Belə ki, klublarımızın hər bir qələbəsi ölkəmizə 0,250, heç-heçə isə 0,125 reytinq xalı qazandırır. Hazırda Azərbaycan UEFA reytinqində 53 ölkə arasında 30-cu pillədədi və hesabında 11.125 reytinq xalı var. Bunun 2.250 xalı cari mövsümdə qazanılıb ("İnter" - 0.750, "Qarabağ" - 0.875, "Neftçi" - 0.625).
"Neftçi" hazırda 8.725 xalla klub sıralamasında Avropanın 174-cü komandasıdı. "Qarabağ" isə 7.725 xalla 195-cidi. Rəqiblərə gəlincə, "Tvente" 42.779 xalla 41-ci, "Partizan" 14.125 xalla 115-cidi.
Avropa Liqası
Pley-off mərhələsi (cavab oyunları)
28 avqust
21:00. Neftçi - Partizan
Hakimlər: Robert Şörgenhofer, Mattias Vinsayer, Roland Brandner, Dominik Ousxan
(Avstriya).
UEFA nümayəndəsi: Kris Bellon (Belçika).
Hakim-inspektor: Mişel Vautrot (Fransa).
Bakı. Tofiq Bəhramov adına Respublika stadionu.
İlk oyun - 2:3
22:30. Tvente - Qarabağ
Hakimlər: Paolo Silvio Matsoleni, Lorenso Manqanelli, Alessandro Petrella, Sebastyano Perutso (İtaliya).
UEFA nümayəndəsi: Eduard Prodani (Albaniya).
Hakim-inspektor: Kostas Kapitanis (Kipr).
Enshede. "Tvente" stadionu.
İlk oyun - 0:0