Elmar Baxşiyev: Neftçinin qrup mərhələsinə vəsiqə qazanması realdı
"Neftçi"nin sabiq kapitanı Elmar Baxşiyev keçmiş komandasının, eləcə də "Qarabağ"ın Avropa Liqasının qrup mərhələsinə düşmək şanslarını dəyərləndirib. Azerisport.az saytına açıqlamasında o, bunları söyləyib:
"Neftçi"nin Serbiya "Partizan"ını keçmək, qrup mərhələsinə düşmək üçün yaxşı şansı var. Belqraddakı ilk oyunda bizim uşaqlar çox yaxşı təsir bağışladılar. Hiss olunur ki, "Neftçi" artıq öz oyununu tapıb. Lakin sonradan rəqibin təzyiqi artırması komandamızın məğlubiyyəti ilə nəticələndi. Halbuki, onları saxlamaq olardı.
Fikrimcə, cavab oyununda "Neftçi"nin daha üstün futbol sərgiləmək növbəsidi. Komandamızı qrup mərhələsindən cəmi bir addım ayırır. Mənə elə gəlir ki, "Neftçi"nin qrup mərhələsinə çıxması realdı".
"Qəbələ"nin sabiq futbolçusu Hollandiya "Tvente"si ilə mübarizə aparan "Qarabağ"la bağlı isə bunları dilə gətirib:
"Mənə elə gəlir ki, "Qarabağ" Bakıdakı oyunda nəyə qadir olduğunu tam olaraq göstərə bilmədi. Əsl "Qarabağ" daha güclüdü. Qazonun vəziyyətinin pis olması komandamızın oyununa öz təsirini göstərdi. Təbii ki, mənfi cəhətdən. Çünki elə qazonda oynamaq daha çox müdafiə olunun "Tvente"nin işinə yarayırdı. Onlar başa düşürdülər ki, açıq oyun getsə, "Qarabağ" qol vura bilər.
"Qarabağ" səfər oyununda daha çox müdafiə haqda düşünməli olacaq. Belədə rəqibi daha çox əks-hücumlarda yaxalamaq lazım gələcək. Qol vurmaq tamamilə mümkündü".