Denis Silva: Het-trik? Hər şey ola bilər
"Neftçi"nin müdafiəçisi Denis Silvanın azerisport.az saytına müsahibəsi
- "Partizan"la cavab matçına hazırlıq necə gedir?
- Fikrimcə, cavab oyunu öncəsi gördüyümüz iş məhsuldardı. Hazırlığımızı intensiv şəkildə davam etdiririk.
- "Neftçi" vacib matça hazırdı?
- Bəli, ilk oyundakı kimi hazırıq.
- Amma həmin hazırlıq sizin qələbə qazanmağınız üçün yetərli olmamışdı. 2:0 öndə olduğunuz oyunu məğlub başa vurmağınıza nə səbəb oldu?
- Həmin oyunun ilk 20 dəqiqəsində mənə iki qol vurmaq nəsib oldu. Amma öz qapımıza qol vurandan sonra hər şey dəyişdi, komanda sındı. Vurduğum avtoqol eyni zamanda yerli azarkeşləri də yuxudan ayıltdı. Onlar həqiqətən öz komandalarını yaxşı dəstəklədilər. İstənilən halda, səfərdəki 2:3 hesablı məğlubiyyətin pis nəticə olduğunu düşünmürəm.
- Rəqib siz gözlədiyiniz dərəcədə təhlükəli idi?
- Bəli. Onlar fiziki baxımdan çox güclüdülər. Bütün oyun ərzində onlara qarşı mübarizə aparmaq çətin idi.
- Cavab oyununda şanslarınızı necə qiymətləndirə bilərsiz?
- Şanslar bərabərdi. Sadəcə, biz öz meydanımızda oynayacağıq. Bundan da yararlanmağımız lazımdı.
- Oyunun keçiriləcəyi mərkəzi arenanın qazonu yaxşı deyil. Bu, sizə problem yaratmayacaq?
- Bu, rəqib üçün də problem ola bilər. Çalışacağıq ki, bu amil komandamızın oyununa təsir göstərməsin.
- Sizdən yenə het-trik gözləyək?
- (gülür) Demək çətindi. Hər şey ola bilər.
- İlk oyunda 5 qoldan üçünün müəllifi olmağınızı kimin aktivinə yazmaq lazımdı?
- Heç kimin. İki epizodda lazım olan vaxtda lazım olan yerdə idim. Bir epizodda isə tam əksinə. Hər halda cavab oyununda da qol vurmaq istəyirəm və buna çalışacam.