Rasim Ramaldanov: Baş məşqçi istefası, cərimə vacib deyil
"Xəzər Lənkəran"ın müdafiəçisi Rasim Ramaldanovun azerisport.az saytına müsahibəsi
- "Simurq"a məğlubiyyətinizə nə səbəb oldu?
- Pis başlamamışdıq. Bir neçə təhlükəli hücum da təşkil etdik. Gözlənilməz qol komandanı sındırdı. Ümumiyyətlə, qol vura bilməməyimiz çox üzücüdü.
- Əksəriyyət bu fikirdədi ki, XL bu mövsüm də ötənilki kimi oynayacaq...
- Komanda uğursuz çıxış edəndə tənqidlər həmişə olur. Amma bütün bunlar bizi ruhdan salmamalıdı. Hər şey qabaqdadı. Ötən mövsüm bizdə heç nə alınmadı. Lakin bu mövsüm toparlanıb, öz oyunumuzu sərgiləməliyik.
- Bəs sizin hələ heç kimin görmədiyi öz oyununuz olacaq?
- Hər şey öz əlimizdədi. Hər şeyi özümüz yaxşıya doğru dəyişə bilərik.
- Artıq Oğuz Çətinin istefası gündəmə gəlib...
- Düzünü deyim ki, bu haqda heç nə eşitməmişəm. Komandada Çətinin getməsini istəmirlər. Yaxşı məşqçidi. Heç nə alınmayan kimi məşqçini istefaya göndərmək vacib deyil.
- Sonra gec olmayacaq? Çünki 9 mümkün xaldan 8-ni itirmisiz...
- Gec-tez biz də öz oyunumuzu tapmalıyıq. Biz elə də güclü olmayan rəqiblərlə oyunlarda xallar itirmişik. Daha güclü rəqiblər isə hələ qarşıdadı.
- Sizin üçün ən çətin rəqiblərdən sayılan "İnter"lə oyunda dönüş yarada biləcəksiz?
- "İnter" ölkənin ən yaxşı komandalarından biridi. Sonadək mübarizə aparacağıq. Geriyə yolumuz yoxdu. Ümid edirəm ki, yaxşı dəstək görəcəyik. "Sumqayıt"la oyunda yarıboş tribunalar qarşısında oynamaq çox üzücü idi. Biz dolu tribunalar önündə oynamağa alışmışıq.
- Zaqataladakı oyunu klub prezidenti Mais Mənsimov da izləyirdi. O, hələ komanda üzvlərinə sanksiya tətbiq etməyib?
- Düzünü deyim, indi komandada elə bir ab-hava var ki, bu barədə heç kim heç nə düşünmür. Bu, futboldu, qələbə də qazana bilərsən, uduza da. Cərimə etmək vacib deyil (gülür). Allah eləsin ki, hər şey qaydasına düşsün.