Azərbaycanın Özbəkistan ilə yubiley qarşılaşması
Bu gün futbol üzrə Azərbaycan yığması 2014-cü ildə növbəti sınağına çıxacaq. Azerisport.az xəbər verir ki, Berti Foqtsun çalışdırdığı komandamızın budəfəki rəqibi Özbəkistan yığması olacaq.
Bəribaşdan qeyd edək ki, Özbəkistan Azərbaycan üçün kifayət qədər tanış rəqibdi. Belə ki, millimiz tarixi ərzində artıq bu komanda ilə 9 dəfə qarşılaşıb. Yubiley matçı ərəfəsində Azərbaycanın özbəklər üzərində 4 qələbəsi var. Özbəkistan yığması millimizi iki dəfə üstələyə bilib. Daha 3 oyunda da tərəflər meydanı sülhlə tərk ediblər. Bir qayda olaraq, yoxlama oyunlarında qarşılaşmış komandaların oyunlarında indiyədək bütövlükdə 21 qol vurulub ki, bunlardan 11-i yığmamızın aktivindədi. Qalan 10 qolu isə özbəklər vurublar.
Azərbaycan və Özbəkistan yığmaları arasındakı əvvəlki oyunlar belə nəticələnib:
24 aprel 1998. Bakı. YO. Azərbaycan – Özbəkistan 2:1
18 avqust 1999. Səmərqənd. YO. Özbəkistan – Azərbaycan 5:1
15 fevral 2001. Albena. YO. Özbəkistan – Azərbaycan 2:1
21 avqust 2002. Bakı. YO. Azərbaycan – Özbəkistan 2:0
28 may 2004. Bakı. YO. Azərbaycan – Özbəkistan 3:1
7 fevral 2007. Karşı. YO. Özbəkistan – Azərbaycan 0:0
7 mart 2007. Çimkənd. BT. Özbəkistan – Azərbaycan 0:1
1 fevral 2009. Dubay. YO. Azərbaycan - Özbəkistan 1:1
1 fevral 2013. Dubay. YO.Azərbaycan - Özbəkistan 0:0
Rəqibimiz Asiya təmsilçisi olsa da, zəif komanda sayıla bilməz. Özbəkistan yığması FİFA-nın son reytinq cədvəlində 51-ci yerdə qərarlaşıb. Komandanın hesabında 528 reytinq xalı var. Azərbaycan isə rəqibi ilə müqayisədə bir qədər geridədi. Foqtsun çalışdırdığı yığmamız avqust ayında açıqlanan siyahıda 73-cü olub (413 xal).
Göründüyü kimi, millimiz Asiya təmsilçisinə yuxarıdan aşağı baxa bilməz. Bəlkə də rəqib Asiya qitəsindən olduğuna görə onu zəif hesab edənlər var. Amma nəzərə almaq lazımdı ki, özbəklər son dünya çempionatına vəsiqə qazanmaq uğrunda mübarizə aparırdı və kiçik bəxtsizlik sayəsində mundiala yollana bilmədilər. Ona görə də, bu komanda ilə oyunda futbolçularımızın işi heç də asan olmayacaq.
Bundan əlavə, yığmamız bu görüşə optimal heyətlə çıxmayacaq. Belə ki, "Qarabağ" və "Neftçi"nin futbolçularına dəvət göndərilməyib. Baş məşqçi Berti Foqts bu klubların Avropa Liqasının pley-off mərhələsində vacib oyunlara çıxmasını nəzərə alaraq, aparıcı futbolçuları yığmaya çağırmayıb. Əvəzində hazırkı heyətdə xeyli yeni futbolçu var ki, onlar bu gün sınaqdan keçirilə bilərlər. Mümkündü ki, bu gənclər özlərini göstərmək üçün gözləniləndən yaxşı çıxış etməklə bizi təəccübləndirsinlər.
Qeyd edək ki, bu qarşılaşma yığmamızın AÇ-2016-nın seçmə mərhələsinə hazırlıq xarakteri daşıyır. Düzdü, çoxları düşünə bilər ki, Özbəkistan İtaliya, Xorvatiya, Norveç, Bolqarıstan və Malta ilə müqayisədə çox da güclü komanda deyil və bu görüşün bizə faydası olmayacaq. Amma ümid edək ki, qarşılaşmanın futbolçularımıza faydası çox olacaq və bunun xeyrini seçmə mərhələ zamanı görəcəyik.
Sonda onu da əlavə edək ki, bu, millimizin 2014-cü ildəki üçüncü yoxlama matçıdı. Yığmamızın ilk sınaq matçı Dubay toplanışı çərçivəsində Filippinə qarşı olmuşdu. Komandamız mart ayının 5-də keçirilən görüşdə 1:0 hesabıyla üstün olmuşdu. Mayın 28-də isə San-Fransiskoda yerli ABŞ yığmasının qonağı olan Berti Foqtsun yetirmələri 2 cavabsız qolla uduzmuşdular.
Foqtsun Özbəkistanla oyunda xidmətindən yararlanmaq şansına malik olduğu futbolçuların siyahısını təqdim edirik:
Qapıçılar: Kamran Ağayev (Qəbələ), Səlahət Ağayev (İnter);
Müdafiəçilər: Rasim Ramaldanov (Xəzər Lənkəran), Mahir Şükürov (Karşıyaka, Türkiyə), Elnur Allahverdiyev (Qəbələ), Emin Cəfərquliyev (Araz Naxçıvan), Ufuk Budak (Qaziantep BB, Türkiyə), İlkin Qırtımov (Simurq);
Yarımmüdafiəçilər: Əli Gökdemir (Simurq), Emin Nuri (Kalmar, İsveç), Məhəmməd Mirzəbəyov (İnter), Rahid Əmirquliyev (Xəzər Lənkəran), Ruslan Abışov (Qəbələ), Taşkın İlter (Ayntraxt, Braunşveyq, Almaniya), Abdulla Abasıyev (İnter), Cavid Hüseynov (Qəbələ), Əfran İsmayılov (Xəzər Lənkəran);
Hücumçular: Vaqif Cavadov (Qaziantep BB, Türkiyə), Rauf Əliyev (Xəzər Lənkəran), Cihan Özkara (Sivasspor, Türkiyə), Rüfət Dadaşov (Tsvaybrüken, Almaniya), Toğrul Erat (Fortuna, Düsseldorf, Almaniya), Dmitri Nazarov (Karlsrue, Almaniya), Kiyan Sultanpur (Sumqayıt)
Ehtiyat oyunçular: Anar Nəzirov (Qəbələ), Ruslan Əmircanov (Qəbələ), Rəşad Sadiqov (Xəzər Lənkəran), Nizami Hacıyev (İnter).
Yoxlama oyunu
20 avqust
21:00. Azərbaycan - Özbəkistan
Bakı. "Bakcell Arena".