Alfred Şroyder: Qarabağa uduzsaq, sensasiya olmayacaq
Hollandiyanın "Tvente" klubunun baş məşqçisi Alfred Şroyder Avropa Liqasının pley-off mərhələsi çərçivəsində Azərbaycan çempionu "Qarabağ"a qarşı keçirəcəkləri ilk oyun öncəsi fikirlərini açıqlayıb. Azerisport.az xəbər verir ki, o, bu gün baş tutan mətbuat konfransında öncə bunları söyləyib:
- Bakıda yaxşı gündü. Oyun öncəsi bir az həyəcan var. Yaxşı oyun göstərməyə, layiqli nəticə qazanmağa çalışacağıq.
- "Qarabağ" 5 il öncə "Tvente" ilə qarşılaşıb. İndi komanda çox dəyişib?
- "Qarabağ" beş il öncə də güclü idi. Amma indi daha təcrübəli komanda olub, daha güclənib. Bu, bizi narahat edir. Bizə çətin olacaq. Bir zədəli futbolçumuz var. Qalanlarında hər şey qaydasındadı.
- "Tvente"nin indi zəiflədiyini, "Qarabağ"ı favorit hesab edənlər var...
- Mən belə düşünmürəm. Belə sözləri eşitməmişəm də.
- Sizcə, sabah hansı nəticə qeydə alınacaq?
- Hesabı dəqiq deyə bilmərəm. "Qarabağ"dan hücum futbolu gözləyirik. Bizim də öz üstünlüklərimiz var. Sabah öz səviyyəmizi göstərəcəyik.
- "Qarabağ"a məğlub olsaz, bu, Hollandiyada necə qarşılanacaq?
- Rəqibə hörmətlə yanaşırıq. Son nəticələr Hollandiyada da məlumdu. Uduzsaq, bu, sensasiya sayılmayacaq. Ölkəmizdə bunu normal qarşılayarlar.
- "Qarabağ" haqda nə bilirsiz?
- Bilirik ki, paytaxtı yox, Ağdamı təmsil edən komandadı. Ev oyunlarını da Ağdamda yox, Bakıda keçirmələrinin səbəbindən xəbərdarıq. Amma mən daha çox futboldan danışmaq istərdim.
- Azərbaycanda oynamış hollandiyalı futbolçulardan - Lorenso Ebesilyodan, Melvin Platyedən "Qarabağ" haqda nəsə soruşmusuz?
- Xeyr. Onlardan heç bir məlumat almamışıq. Bizim öz mənblərimiz var idi.
- "Qarabağ"ın heyətində kimi fərqləndirə bilərsiz?
- Hamısı cəld və sürətli oyunçulardı. Leroy Corcu tanıyırıq. Çox təhlükəli oyunçudu. Almeyda və Reynaldo da məşhurdu. Onlar bizə problem yarada bilərlər. Danilo Diası da qeyd edərdim.