Muntyanu Qəbələdə dava düşdüyü haqda xəbəri təkzib etdi
Rumıniya mətbuatı "Qəbələ"nin düşərgəsində dava düşdüyü barədə məlumat yayıb. Azerisport.az xəbər verir ki, bu komandanın Premyer Liqanın ilk turunda "İnter"ə 0:4 hesablı məğlubiyyətindən sonra paltardəyişmə otağında futbolçular arasında dava düşdüyü iddia olunur.
"Sportnews"un məlumatına görə, məhz bu oyundan sonra Kristian Pulhak komandadan ayrılaraq, vətəninə yollanıb. O, "Qəbələ" ilə müqaviləsini qarşılıqlı razılıq əsasında pozub. Lakin müdafiəçi klubdan gedişinin konkret səbəbini açıqlamayıb. Əvəzində klubun düşərgəsində yaşanan dava haqqında eşitdiyini gizlətməyib.
Andrey Kristya isə rumıniyalı jurnalistlərə açıqlamasında sadəcə, bunları deməklə kifayətlənib: "Komandamızda yaxşı atmosfer var. Başqa heç nəyi müzakirə etmək istəmirəm".
Muntyanunun agenti Leonid İstratinin sözlərinə görə, son vaxtlar komandada sadəcə, bir münaqişə yaşanıb: "Hollandiya toplanışı zamanı braziliyalı futbolçulardan biri intizamı pozmuşdu. Nəticədə də Muntyanu həmin futbolçunu (söhbət məşqə içkili vəziyyətdə gələn Dododan gedir - red.) əvəzedici komandaya göndərdi. Ondan sonra hər şey qaydasındadı".
Muntyanu isə azerisport.az saytına açıqlamasında bu barədə yazılanları təkzib edib: "Mən heç bu barədə danışmazdım. Amma Azərbaycan mətbuatına hörmətim olduğuna görə, komandama yaxşı münasibət göstərdiyinizə görə, bunu şərh edəcəm. Bütün bunlar qəsdən ortaya atılan təxribat və yalandan başqa bir şey deyil. Paltardəyişmə otağımızda heç bir dava düşməyib. Komandamızda yaxşı atmosfer var. Bütün bunları nəzərə alsaq, Rumıniya mətbuatında yazılanları oxumaq heç də xoş deyil. Həmin oyundan sonra heç Pulhak paltardəyişmə otağında olmayıb".
