Dmitri Nazarov: Millinin uğur qazanması üçün əlimdən gələni edəcəm
Futbol üzrə Azərbaycan yığmasının və Almaniyanın "Karlsrue" klubunun hücumçusu Dmitri Nazarovun azerisport.az saytına müsahibəsi
- Özünüzü necə hiss edirsiz?
- Yaxşıyam, formadayam. Yüz faiz hazıram.
- Havaların isti olması sizə mane olmur?
- Havanın isti olması hiss olunur. Hazırda Almaniyada hava soyuqdu. Bir-iki günə adaptasiya olacam. Heç bir problem yoxdu.
- Millidə ilk sizi təəccübləndirən nə oldu?
- Alman dilli futbolçular burada çoxdu. Bunun da mənə böyük köməkliyi olacaq.
- Azərbaycanla bağlılığınız nədi?
- Mənim babam Azərbaycandandı. Təəssüflər olsun ki, o, indi yaşamır.
- Azərbaycan dilində hansısa bir kəlmə bilirsiz?
- Təəssüflər olsun ki, bilmirəm.
- Babanız Azərbaycanın hansı bölgəsindən olub?
- Bunu deyə bilmərəm.
- Babanız haqda maraqlanmamısız?
- Bu barədə nənəmlə söhbət etmişəm. Ancaq Azərbaycanın hansı bölgəsindən olduğu dəqiq yadımda deyil.
- Azərbaycanda milliləşdirilmiş futbolçular elə də xoş qarşılanmır. Bu, sizi narahat etmir ki?
- Bu ölkəyə bağlılığım var. Təklif də gəlib. Milli komandanın uğur qazanması üçün əlimdən gələni edəcəm. Mənim üçün vacib olan budu.
- Sizinlə yenidən Qazaxıstan Futbol Federasiyasından əlaqə saxlayan olub?
- Bu, keçmişdə də olub. Yenə də çalışırlar ki, mən Qazaxıstan millisində çıxış edim. Ancaq mən artıq qərarımı qəbul etmişəm. Mənim özüm də, valideynlərim də Qazaxıstanda doğulub.