Elvin Yunuszadə: Neftçi Çixuradan güclü olduğunu göstərdi
"Neftçi"nin müdafiəçisi Elvin Yunuszadənin azerisport.az saytına müsahibəsi
- Gürcüstan "Çixura"sına Avroliqadakı ilk oyununuzda qalib gələ bilmədiz. Oyun barədə nə deyə bilərsiz?
- Fikrimcə, biz rəqibdən daha yaxşı oynadıq. Təəssüf ki, qol vura bilmədik. Bu, üstünlüyümüzü hesabda əks etdirməyimizə mane oldu.
- Sizcə, niyə komandanız qol vura bilmədi?
- İlk növbədə bəxtsizlik və isti hava səbəbindən. Qaçmaq çətin idi. Çox isti var idi. Hava şəraiti öz sözünü dedi. Meydança çox ağır idi.
- Bəs nə olacaq?
- Mərhələni keçməliyik. Qarşıda daha 90 dəqiqəmiz var. Yaxşı şansımızın olduğunu düşünürəm. Fikrimcə, 0:0 hesabı pis nəticə deyil. Unutmayın ki, biz ötən mərhələdə Sloveniya "Koper"inə evdə uduzmuşduq. Amma onları səfərdə məğlub etdik. Bu dəfə isə evdə qolsuz heç-heçə olub. Bu, o deməkdi ki, səfərdə qollu heç-heçə ilə mərhələ keçə bilərik.
- "Neftçi" niyə son dövrlər doğma meydanda qələbə qazana bilmir?
- Artıq səkkizinci avrokubok oyunumuzdu ki, evdə qələbə qazanmırıq. Özümə də maraqlıdı ki, niyə belə alınır. Amma evdə qələbə qazana bilməsək də, əsas odu ki, mərhələ keçək. Yəqin ki, mənimlə çoxları razılaşar.
- Yəni "Çixura" səddini də keçə biləcəksiz?
- Fikrimcə, hə. İlk oyun göstərdi ki, biz gürcülərdən güclüyük.