Hütter: Qarabağa qarşı çempionatda oynadığımız kimi mübarizə aparacağıq
Avstriyanın "Zalsburq" klubunun baş məşqçisi Adolf Hütter UEFA Çempionlar Liqasının üçüncü təsnifat mərhələsi çərçivəsində Azərbaycan çempionu "Qarabağ"a qarşı keçirəcəkləri ilk oyun öncəsi fikirlərini açıqlayıb. Azerisport.az xəbər verir ki, o, bunları söyləyib:
"Qarabağ" yaxşı motivasiya olunmuş komandadı, sona kimi mübarizə aparmağı bacarır. Həm də rəqibimiz doğma publika önündə oynayacaq. Belə komandaya qarşı 30 min azarkeşin qarşısında oynamaq asan olmayacaq. Bizi çox çətin oyun gözləyir".
Hütter ağdamlıların heyətində kimisə fərqləndirmək istəməyib: "Mən sadəcə, braziliyalıları fərqləndirməyin əleyhinəyəm. "Qarabağ" çox gözəl komanda oyunu sərgiləyir. Biz, sadəcə, öz futbolumuzu oynayacağıq. Rəqibin necə oynaması bizim üçün əhəmiyyət kəsb etməməlidi. Əlbəttə, hansısa futbolçunu fərqləndirmək lazımdısa, Reynaldonu qeyd etmək olar".
Baş məşqçi Avstriya Bundesliqasındakı möhtəşəm startın davamını gətirməyə çalışacaqlarını bildirib: "Hazırda biz yaxşı vəziyyətdəyik. Çalışacağıq ki, çempionatda sərgilədiyimiz oyunu burada da göstərək. "Qarabağ" təzyiq altında oynayacaq".
Oyun ərəfəsində "Zalsburq"un heyətində dörd itki var. "Qırmızı buğalar"ın baş məşqçisi bu məqama da toxunub: "Heyətimizdə itkilər var. Dörd futbolçumuz oynaya bilməyəcək. Amma bizim kifayət qədər futbolçumuz var ki, bu itkilərin yoxluğunu hiss etdirməyək".
Hütter Bakıda hansı taktika ilə oynayacaqlarına dair suala belə cavab verib: "Bundesliqadakı son oyunlarımızda necə çıxış etmişiksə, "Qarabağ"a da qarşı elə oynayacağıq".