Qurban Qurbanov: Nəticə qazanmaq üçün əlimizdən gələni edəcəyik
"Qarabağ"ın baş məşqçisi Qurban Qurbanov UEFA Çempionlar Liqasının üçüncü təsnifat mərhələsi çərçivəsində Avstriya "Zalsburq"una qarşı keçirəcəkləri ilk oyun öncəsi fikirlərini açıqlayıb. Azerisport.az xəbər verir ki, o, bunları söyləyib:
"Bizi ciddi rəqiblə qarşı oyunlar gözləyir. Maraqlı oyun olacaq. Çalışacağıq ki, yaxşı oyun göstәrәk. Nәticә qazanmaq üçün əlimizdən gələni edəcəyik. Komandamız yaxşı hazırlaşıb".
"Zalsburq"un futbolçularının açıqlamaları da onların yaxşı formada olmalarından xəbər verir. Onları yaxşı öyrənmişik. Çox sürətli komandadı. Sürətli hücumlar qurmağı bacarırlar. Ustalıq səviyyələri yüksəkdi. Müdafiədə çox diqqətli olmalıyıq. Amma sürətdə onlara uduzmayacağıq".
Qurbanov komandasının bu gün məşq etməməsinin də səbəbini açıqlayıb: "Uşaqlara istirahət vermək istədim. Sabah yüngül məşqə çıxacağıq".
Baş məşqçi komandanın iki aparıcı üzvü - Rəşad Sadıqovla Maksim Medvedevin hazırkı durumuna da toxunub: "Rəşadla Maksim tədricən forma yığır. Onlar artıq komanda ilə birgə məşq edirlər".
Qurbanovun sözlərinə görə, indiki "Qarabağ" əvvəlkilərlə müqayisədə daha güclüdü: "Qarabağ" indi daha çox təcrübə toplayıb. Futbolçularımızın ustalıq səviyyəsi də yüksəlib. Güclü çempionatlardan yeni legionerlərimiz gəlib. "Zalsburq" son illərdə çox artırıb. 3-4 futbolçusu var ki, yaxın gələcəkdə Avropanın aparıcı klublarında çıxış edə bilər. Bu komanda vaxtilə qarşılaşdığımız komandalar arasında Dortmund "Borussiya"sına bənzəyir".