Sxadadze: Hələ də başa düşə bilmirəm ki, hakim niyə bizə qarşı belə davrandı
"İnter"in hücumçusu Baçana Sxadadzenin azerisport.az saytına müsahibəsi
- "İnter"in Avroliqada İsveç "Elfsborq"unu mübarizədən kənarlaşdırmasına nə mane oldu?
- Heç özüm də bilmirəm. Biz yaxşı oynadıq. Amma baş hakim üçüncü dəqiqədə qapınıza penalti təyin edirsə, oyunçunuzu meydandan qovursa, nə etmək olar? Onun bu qərarları bizi məhv etdi.
- Amma azlıqda da pis təsir bağışlamadız...
- 10 nəfərlə oynasaq da, rəqib yenə qol vəziyyətləri yarada bilmirdi. Amma qol epizodunda həmin futbolçunu bağlayan oyunçumuz olmadı. Bizə bu oyunda hakim və ya başqasının köməyi lazım deyildi. Amma kiminsə oyunumuza mane olmasına da ehtiyac yox idi. Məgər evdə oynayan bir komandanın oyununu bu cür idarə etmək olar? Hələ də başa düşə bilmirəm ki, bolqarıstanlı hakim niyə bizə qarşı belə davrandı.
- Demək olar ki, "İnter"in növbəti mərhələyə çıxmasına məhz Stanislav Todorovun qərarları mane oldu?
- O, konkret olaraq bizi "öldürdü". Rəqibin lehinə çox qərarlar qəbul etdi. Amma eyni hallar bizim oyunçulara qarşı olanda susurdu.
- Penaltilərə hazırlaşmışdız?
- Əlbəttə. Amma bu, lotereyadı. Uşaqların hər biri sonadək mübarizə apardı. Mən özüm bir hissə oynadım, amma əksəri 120 dəqiqə meydanda oldu. Uşaqlara görə çox təəssüflənirəm.
- Siz hücumda heç də pis təsir bağışlamırdız. Niyə əvəzləndiz?
- Hər mövqeyə qaça bilmirdim.
- Bəs niyə Dieqo Madriqal yox, məhz siz əvəzləndiz?
- Bilmirəm. Bu, baş məşqçinin qərarıdı. Ağlamaq istəyirəm, amma bacarmıram.
- Baş məşqçi oyundan sonra sizə nə dedi?
- Nə deməli idi ki? Heç nə. Uşaqlara təşəkkürünü bildirdi. Komanda 120 dəqiqə ərzində çox yaxşı mübarizə apardı. Qolu heç nədən buraxdıq, özü də azlıqda olarkən.
