Neftçinin rəqibinin oyununda qalmaqal: türkiyəli jurnalistlər döyüldü
Avropa Liqasının ikinci təsnifat mərhələsi çərçivəsində ötən gecə keçirilmiş "Çixura" - "Bursaspor" matçından sonra qalmaqal yaranıb. Azerisport.az xəbər verir ki, Gürcüstanda keçirilən cavab qarşılaşmasının taleyini penaltilər həll edib və iki oyuna, həmçinin əlavə yarım saatda qol vura bilməyən komandaların duelindən onbirmetrlik zərbələri daha dəqiq yerinə yetirən "Çixura" növbəti mərhələyə adlayıb və "Neftçi"yə rəqib olub.
Lakin qarşılaşmadan sonra təşkil olunan mətbuat konfransında qalmaqal düşüb. Gürcüstan klubunun baş məşqçisi Soso Pruidzenin açıqlamalarının türk dilində tərcümə olunmaması qonaq jurnalistlərin narazılığına səbəb olub. Nəticədə, iki ölkə jurnalistləri arasında dava düşüb. Münaqişə zamanı operatorlardan birinin kamerası sındırılıb, həmçinin DHA-nın müxbiri Emre Koşak döyülüb. Daha bir jurnalistin telefonu sınıb.
Hadisədən sonra vaxtilə "Trabzonspor"da oynamış gürcü futbolçu Arçil Arveladze konfrans zalına daxil olaraq türkiyəli jurnalistlərdən üzr istəyib.