Böyükağa Hacıyev: “Böyük hədiyyə”yə görə “minnətdaram”
"Neftçi"nin baş məşqçisi Böyükağa Hacıyev Topaz Premyer Liqasının 31-ci turu çərçivəsində "Sumqayıt"a qarşı keçirdikləri oyunu şərh edib. Azerisport.az xəbər verir ki, paytaxt klubunun çalışdırıcısı 1:3 hesabıyla bitən qarşılaşmadan sonra bunları söyləyib:
“Futbolçularıma mənə etdikləri “böyük hədiyyə”yə görə “minnətdaram”. Bu gün mənim 56 yaşım tamam olur. Bunu yadımda saxlayacam. “Sumqayıt” daha yaxşı oynadı. Layiqli qələbə qazandı. Rəqib komandanın gənc futbolçuları bizdən daha istəkli oynadılar. Əgər “Neftçi”də qalası olsam, kubokun cavab oyunundan sonra yeni komanda yığacam. Köhnələrlə vidalaşmağa çalışacam. Su bir yerdə çox qalanda iylənər. Heyətə “yeni qan” lazımdı. Kubokda inamlı oynayıb, qələbə qazanmaq lazımdı. Çempionatda “İnter” də bizdən 3 xal irəlidədi. Mövsümü titulsuz başa vurmaq istəmirəm. Sabahdan “Rəvan”la oyunun hazırlığına başlayacağıq. Bu gün futbolçularımın rəqib qarşısında acizliyini gördüm. Heç kimi qınamıram, günah özümüzdədi. Artıq bu futbolçular “doyub”. Komandamı meydanda tanımadım, oynamaq istəmədilər. Bu gün autsayderə qarşı oynayırıq, sabah isə avrokuboklarda oynayacağıq. Bu komanda ilə çox uzağa getmək olmaz. Bu oyunu yüksək səviyyədə oynamaq lazım idi. “İnter” hal-hazırda yüksəlişdədi, səfərdə “Bakı”nı 4:0 hesabı ilə məğlub etdi. Autsayderə 1:3 hesabı ilə uduzmaq isə biabırçılıqdı. Bəzi futbolçuların yerinə olsam, gecə intihar edərdim. Bugünkü nəticə “Neftçi”nin tarixi üçün qara ləkədi. Araz Abdullayev gərək azarkeşə cavab verməyəydi”.
