6 fevral 2012 16:23
İnterdən 6 oyuna 9 xal
Xəbər verdiyimiz kimi, Türkiyədə təlim-məşq toplanışını başa vuran “İnter” artıq vətənə dönüb. Azerisport.az xəbər verir ki, klubun mətbuat xidməti komandanın Antalya toplanışının yekunlarını hazırlayıb.
Həmin məqamlarla sizi də tanış edirik. Beləliklə, təlim-məşq toplanışı çərçivəsində “İnter” 6 yoxlama matçı keçirib. 2 qarşılaşmada “İnter” qələbə qazanıb, 3 oyunda sülhə imza atıb və 1 matçda məğlub olub.
Xatırladaq ki, komanda Türkiyə təmsilçisi “Konya Şəkərspor” komandasına (3:2) və Avstriya çempionu “Şturm” komandasına (2:1) qalib gəldi. Albaniya çempionu “Skenderbeu”, Ukrayna təmsilçisi “Volın” və Qazaxıstanın “Jetısu” komandalarıyla qolsuz bərabərliyə nail olan “İnter” Almaniyanın “Karlsrue” komandasına 1:3 hesabıyla məğlub olub.
“İnter”in keçirdiyi 6 oyunda vurulan qolların 2-ni Baçana Tsxadadze aktivinə yazıb. Bronislav Çervenka, Girt Karlson və Asif Məmmədov hərəyə 1 qol vurublar. Daha bir qol isə avtoqol nəticəsində qeydə alınıb.
Əlavə edək ki, toplanış çərçivəsində “İnter” Ukraynanın “Volın” və Avsrtiyanın “Şturm” komandalarının da qatıldığı mini-turnirdə iştirak edib. Oyunların nəticələrinə əsasən Kaxaber Tsxadadzenin yetirmələri turniri ilk sırada başa vurub.
