4 fevral 2012 20:35
Realla yoldaşlıq oyunu keçirmək istəyən klublara şok təklif
Heyətində Məsut Özil, Ronaldo, Kaka, Hiquayn, Kasilyas, Di Maria, Nuri Şahin kimi ulduzlar olan “Real” ilə yoldaşlıq oyunu keçirmək üçün böyük məbləğdə pul ödəmək lazımdı. Azerisport.az xəbər verir ki, “Kral Klubu” yoldaşlıq oyunu üçün 2 milyon avro pul tələb edir.
Bu barədə Hondurasın “La Tribuna de Honduras” qəzeti xəbər yayıb. Qəzetin iddiasına görə, ölkənin “Olimpia” klubu 100 illik yubiley tədbirləri çərçivəsində “Kral Klubu” ilə yoldaşlıq oyunu keçirmək istəyib. Amma İspaniya təmsilçisinin 2 milyon avro tələbi amerikalıların arzusunu gözündə qoyub.
“Real” rəhbərliyi üstəlik başqa tələblərlə də çıxış edib. Belə ki, təşkilatçı tərəf oyundan əvvəl 5 futbolçunun mətbuat konfransını təşkil etməli, “Real”ın 4 rəsmi sponsporunun matçda reklam lövhələrini yerləşdirməli, məşq və oyun təbii örtüklü meydanda keçirilməli, komandanın həmin ölkəyə yollanması üçün çarter reysi təşkil olunmalı, heyət 5 ulduzlu oteldə yerlişdərilməli, komandanın ixtiyarına şoferi ilə birlikdə 3 limuzin və 2 ən azı 6 nəfərlik mikroavtobus verilməli, komanda öz mühafizə ilə təmin edilməlidi.
