3 fevral 2012 18:38
Bakı supertransferi rəsmən bitirdi
"Bakı" futbol klubu daha bir transfer reallaşdırıb. Azerisport.az xəbər verir ki, ispaniyalı hücumçu Serxio Kontreras Pardo imzalanan müqaviləyə əsasən, bir il "Bakı"nın şərəfini qoruyacaq.
“Koke” ləqəbi ilə tanınan futbolçu artıq komandanın düşərgəsindədəi. O, 1983-cü ilin 27 aprel tarixində Malaqada (İspaniya) anadan olub. Peşəkar futbol karyerasını 2001-ci ildə "Malaga"nın B komandasında başlayıb. Tədricən əsas heyətdə yer alan Koke 2003-cü ilə qədər doğma şəhərinin klubunda oynayıb.
2004-cü ildə Fransanın iddialı klublarından sayılan "Marsel"ə transfer olunan Kontreras 43 oyunda meydana çıxıb və 6 qola imza atıb.
2006-cı ildə icarə əsasında Portuqaliyanın "Sportinq" klubunun şərəfini qoruyub. Ardından Kokenin Yunanıstan karyerası başlayıb. 2006-2011-ci illər ərzində "Aris" forması geyən forvard 132 oyuna 28 qol vurub.
2011-ci ilin əvvəllərində Amerika Birləşmiş Ştatlarının "Xyuston Dinamo" klubunun heyətində yer alan Koke 7 oyun keçirib. Son mövsüm yenidən İspaniyaya qayıdan hücumçu "Rayo Valekano" ilə anlaşıb. laliqada 5 oyuna çıxan Koke 1 qola imza atıb.
2012-ci ilin fevral ayından etibarən "Bakı" ilə müqavilə imzalayıb.
